పవన్‌ కళ్యాణ్‌ రేంజ్‌లో సుడిగాలి సుధీర్‌ క్రేజ్‌.. స్టేజ్‌పైన అనసూయ, కె రాఘవేంద్రరావులకు షాక్‌.. వామ్మో

సుడిగాలి సుధీర్‌ `జబర్దస్త్`తో పాపులర్‌ అయ్యాడు. హీరోగా మారడంతో అతని ఫాలోయింగ్‌ మరింతగా పెరిగింది. అయితే అది మామూలు స్థాయిలో కాదు, ఏకంగా పవన్‌ కళ్యాణ్ ఫ్యాన్స్ తరహాలో హోరెత్తించడం విశేషం.   

`జబర్దస్త్` ఫేమ్‌ సుడిగాలి సుధీర్‌కి ఈ షో ఎంతో గుర్తింపుని తీసుకొచ్చింది. ఇంటర్నెట్‌లో మంచి ఫాలోయింగ్‌ని పెంచింది. టీవీ ఆడియెన్స్ కి దగ్గర చేసింది. జబర్దస్త్ షోని చూసే వాళ్లు చాలా వరకు సుధీర్‌ అభిమానులుగా మారిపోయారు. కుర్రాళ్లు మాత్రం ఆయన్ని ఫాలో అవడం ప్రారంభించారు. బుల్లితెరపై ఓ సూపర్‌ స్టార్‌ ఇమేజ్‌ సుడిగాలిసుధీర్‌ సొంతమంటే అతిశయోక్తి కాదు. 

ఆ ఇమేజ్‌ రేంజ్‌ ఏంటో తాజాగా చూపించారు ఆయన అభిమానులు. ఆయన నటించిన సినిమా ఈవెంట్‌లో సుధీర్‌ రాకతో హోరెత్తించారు. పవర్‌ స్టార్‌ పవన్‌ కళ్యాణ్‌ ఫ్యాన్స్ తరహాలో అరుపులతో మారుమోగించడం విశేషం. సుధీర్‌ మెయిన్‌ లీడ్‌గా చేస్తున్న చిత్రం `వాంటెడ్‌ పండుగాడ్‌`. కె. రాఘవేంద్రరావు సమర్పణలో, శ్రీధర్‌ సీపాన రూపొందించిన చిత్రమిది. ఇందులో సుడిగాలి సుధీర్‌, సునీల్‌, అనసూయ, దీపికా పిల్లి వంటి వారు ప్రధాన పాత్రలు పోషించారు. 

`వాంటెడ్‌ పండుగాడ్‌` చిత్రం ఆగస్ట్ 19న విడుదల కానుంది. తాజాగా ఆదివారం హైదరాబాద్‌లో చిత్ర ప్రీ రిలీజ్‌ ఈవెంట్ ని నిర్వహించారు. ఇందులో అనసూయ చివర్లో రావడంతో ఆమె కోసం అభిమానులు హో ఏసుకున్నారు. ఆ వెంటనే ఆమెతో మాట్లాడించారు. దీంతో కాసేపు అరుపులతో గోల చేసిన అభిమానులు.. అంతలోనే సుడిగాలి సుధీర్‌ ఈవెంట్‌కి రావడంతో మరింతగా రెచ్చిపోయారు. కంటిన్యూగా హోరెత్తించారు. అరుపులు, ఈలలు, కేకలతో రచ్చ చేశారు. 

అనసూయ మాట్లాడుతున్న సమయంలోనే ఇది జరగడంతో ఆమె వారిని సముదాయించి మాట్లాడే ప్రయత్నం చేసింది. కానీ అభిమానులు ఏమాత్రం తగ్గలేదు. మరింత పెంచి హోరెత్తించారు. దీంతో మధ్య లోనే అనసూయ తన ప్రసంగాన్ని ముగించింది. ఆమె వద్ద నుంచి మైక్‌ తీసుకుని అభిమానులను సముదాయించే ప్రయత్నం చేశారు కె. రాఘవేంద్రరావు. ఆయన కూడా వారిని వారించే ప్రయత్నంచేయగా, ఫ్యాన్స్ ఆగలేదు. దీంతో సుడిగాలి సుధీర్‌కి మైక్‌ ఇచ్చేశాడు రాఘవేంద్రరావు. 

కానీ కాసేపు గ్యాప్‌ ఇచ్చారు. అప్పుడే సుధీర్‌ మాట్లాడితే కిక్‌ ఉండదని భావించిన యాంకర్‌ కాసేపు ఆపి, బిగ్‌ టికెట్‌ లాంచ్‌ చేయించారు. అనంతరం రాఘవేంద్రరావు మాట్లాడారు. ఆయన తర్వాత సుడిగాలి సుధీర్‌కి మైక్‌ ఇవ్వగా మరోసారి రెచ్చిపోయారు అభిమానులు. పవన్‌ కళ్యాణ్‌ అభిమానుల తరహాలో అరుపులతో మోతమోగించారు. దీంతో ప్రాంగణం మొత్తం దద్దరల్లినంత పనైంది. సుడిగాలి సుధీర్‌కి ఈ రేంజ్‌ ఫాలోయింగ్‌ ని చూసి రాఘవేంద్రావు, అనసూయ మాత్రమే కాదు, మిగిలిన వారంతా షాక్‌ అవుతున్నారు. 

చివరగా మాట్లాడిన సుడిగాలి సుధీర్‌.. ఇప్పటికే ఏం మాట్లాడాలో తెలియక టెన్షన్‌గా ఉందని, మళ్లీ మీరు ఇలా అరిస్తే మరింత టెన్షన్‌గా ఉంటుందని చెప్పగా, కాస్త సైలెంట్‌ అయ్యారు. రాఘవేంద్రరావు సినిమాలు చూస్తూ పెరిగిన తాను.. ఇప్పుడు ఆయన సినిమాలో నటించే అవకాశం రావడం అదృష్టంగా భావిస్తున్నట్టు చెప్పారు సుధీర్‌. ఈ చిత్రాన్ని థియేటర్లోనే చూసి ఆనందించాలని, మిగిలిన అన్ని సినిమాలను ఆదరించాలని తెలిపారు. 

అనసూయకి సోషల్‌ మీడియాలో భారీ క్రేజ్‌ ఉంది. కానీ సుడిగాలి సుధీర్ ఫ్యాన్స్ దెబ్బకి ఆమె సైలెంట్‌ కావడం గమనార్హం. ఇదిలా ఉంటే వీరిద్దరు కలిసి ఇప్పుడు `సూపర్‌ సింగర్‌ జూనియర్‌` షోకి హోస్ట్ గా చేస్తున్నారు.