Dil Raju: నిఖిల్ 'కార్తికేయ 2' వివాదంపై దిల్ రాజు తీవ్ర వ్యాఖ్యలు.. సక్సెస్ మీట్ లో భావోద్వేగం..

నిఖిల్ నటించిన కార్తికేయ 2 చిత్రం రీ సౌండింగ్ బ్లాక్ బస్టర్ దిశగా దూసుకుపోతోంది. కేవలం మూడు రోజుల్లో నే బ్రేక్ ఈవెన్ పూర్తి చేసుకున్న కార్తికేయ 2 వసూళ్ల ప్రభంజనం సృష్టిస్తోంది. హిందీలో కూడా ఈ చిత్రానికి రోజు రోజుకి కలెక్షన్స్ పెరుగుతున్నాయి. చిత్ర యూనిట్ మొత్తం సక్సెస్ సెలెబ్రేషన్స్ లో మునిగిపోయారు. మంగళవారం రోజు హైదరాబాద్ లో సక్సెస్ మీట్ నిర్వహించారు. 

ఈ చిత్రం విడుదలకు ముందు నుంచి టాలీవుడ్ అగ్ర నిర్మాత దిల్ రాజుపై సోషల్ మీడియాలో తీవ్ర విమర్శలు వినిపిస్తూ వస్తున్నాయి. కార్తికేయ 2 రిలీజ్ ఆలస్యం వెనుక దిల్ రాజు హస్తం ఉందని.. అలాగే ఆ చిత్రానికి థియేటర్స్ కొరత విషయంలో కూడా దిల్ రాజుని విమర్శిస్తూ కామెంట్స్ కనిపించాయి. మీడియాలో కూడా ఇది పెద్ద ఎత్తున హాట్ టాపిక్ అయింది. 

ఇలా వరుస విమర్శలు వినిపిస్తున్న నేపథ్యంలో దిల్ రాజు నేడు కార్తికేయ 2 సక్సెస్ మీట్ లో ప్రత్యక్షం అయ్యారు. కార్తికేయ 2 వివాదం, తనపై వస్తున్న విమర్శలకు పూర్తి క్లారిటీ ఇచ్చే ప్రయత్నం చేశారు. తొలి సారి దిల్ రాజు ఎమోషనల్ గా ప్రసంగించారు. తీవ్రమైన వ్యాఖ్యలు కూడా చేశారు. 

కార్తికేయ 2 చిత్రం ఇండియా మొత్తం ఎపిక్ బ్లాక్ బస్టర్ గా నిలిచింది. అందుకు చిత్ర యూనిట్ మొత్తానికి కంగ్రాట్స్ అని దిల్ రాజు తెలిపారు. జూన్, జూలై నెలల్లో సినిమాల పరిస్థితి గమనిస్తే తెలుగు చిత్ర పరిశ్రమ ఎటు పోతోంది అనిపించింది. కానీ ఆగష్టు నెల చిత్ర పరిశ్రమకి ఒక ఊపిరి తీసుకువచ్చింది. వరుసగా బింబిసార, సీతారామం, కార్తికేయ 2 విజయం సాధించాయి. 

నిర్మాతల అనుమతితో ఈ సక్సెస్ మీట్ లో ఒక విషయం గురించి క్లారిటీ ఇవ్వాలని అనుకుంటున్నా. ఈ సినిమా ముందు నుంచి నిఖిల్ నాతో చర్చిస్తూనే ఉన్నాడు. నేను ముందుగా థాంక్యూ చిత్రాన్ని జూలై 8న రిలీజ్ చేయాలని అనుకున్నా. కానీ అప్పటికి మూవీ రెడీ కాలేదు. కార్తికేయ 2 జూలై 22 అని ప్రకటించారు. దీనితో కార్తికేయ నిర్మాతలని ఆ డేట్ మాకివ్వమని రిక్వస్ట్ చేశా. అప్పుడు నిఖిల్, చందు ఇద్దరితో కూడా చర్చించా. వాళ్లిద్దరూ మేం వేరే డేట్ చూసుకోవడానికి రెడీ అని చెప్పారు. 

మా మధ్యన చాలా హెల్దీగా చర్చ జరిగింది. కానీ బయట ఏవేవో పుకార్లు రేపు గ్యాప్ క్రియేట్ చేసే ప్రయత్నం చేశారు. అందుకే ఇప్పుడు క్లారిటీ ఇస్తున్నా. ఆ తర్వాత నిఖిల్, చందు ఆగష్టు 5న మా సినిమాని రిలీజ్ చేస్తాం అని చెప్పారు. అదే రోజు రెండు చిత్రాలు ఉన్నాయి కదా.. వాటి ఫీడ్ బ్యాక్ కూడా బావుంది.. కొంచెం చూసుకోండి అని సలహా ఇచ్చా. అది సలహా మాత్రమే. ఆ తర్వాత 12న రిలీజ్ డేట్ అనుకున్నారు. అడ్జెస్ట్ మెంట్ లో భాగంగా 13న రిలీజ్ చేశారు. 

కానీ ఇంతలోపు బయట ఎవరికి ఇష్టం వచ్చినట్లు వాళ్ళు ప్రచారం చేశారు. కార్తికేయ 2ని తోక్కేస్తున్నారు అంటూ పుకార్లు రేపారు. ఇలాంటి అసత్య ప్రచారాలతో మమ్మల్ని బలిపశువుల్ని చేయొద్దు. నామీద గతంలో కూడా విమర్శలు వచ్చాయి. కానీ నేనెప్పుడూ మాట్లాడలేదు. హ్యాపీ డేస్ చిత్రం నుంచి నిఖిల్ నాకు బాగా క్లోజ్. అలాంటిది ఈ చిత్రాన్ని పాడు చేయాలని నేనెందుకు అనుకుంటా. 

సినిమా కోసం నేను ప్రాణం ఇస్తా. సినిమాని పాడు చేయాలని ఎప్పుడూ అనుకోను. చాలా సందర్భాల్లో నేను డబ్బులు నష్టపోయి కూడా సినిమాలు రిలీజ్ చేశా. సినిమా అంటే అంత ఇష్టం నాకు అని దిల్ రాజు కార్తికేయ 2 సక్సెస్ మీట్ లో భావోద్వేగానికి గురయ్యారు. దిల్ రాజు క్లారిటీ ఇవ్వడంతో ఈ సమస్యకు ఫుల్ స్టాప్ పడ్డట్లే అని కామెంట్స్ వినిపిస్తున్నాయి.