జగన్‌పై దాడి: నవంబర్ 6న విచారణ జరపనున్న హైకోర్టు

విశాఖ ఎయిర్‌పోర్ట్‌లో అక్టోబర్ 25వ తేదీన శ్రీనివాసరావు  అనే యువకుడు తనపై దాడికి పాల్పడడంపై  వైసీపీ చీఫ్ వైఎస్ జగన్‌ బుధవారం నాడు హైకోర్టులో పిటిషన్ దాఖలు చేసిన సంగతి తెలిసిందే. దీనిని స్వీకరించిన న్యాయస్థానం విచారణను నవంబర్ 6కు వాయిదా వేసింది.

ఇదే కేసుకు సంబంధించి వైసీపీ మాజీ ఎంపీ వైవీ సుబ్బారెడ్డి వేసిన పిటిషన్‌తో కలిపి జగన్ పిటిషన్‌ను విచారిస్తామని ధర్మాసనం స్పష్టం చేసింది. తనపై దాడి జరిగిన కొద్దిసేపటికే నిందితుడు శ్రీనివాసరావు ఫ్లెక్సీలు తీసుకురావడం.. ఏపీ సీఎం చంద్రబాబు నాయుడు మీడియా సమావేశం ఏర్పాటు చేయడంపై జగన్ అనుమానాలను వ్యక్తం చేశారు.

ఈ కేసు విచారణను త్వరగా పూర్తి చేసేందుకు వీలుగా విశాఖ నార్త్‌జోన్ పోలీసులకు కేసును అప్పగించారని ఆయన అనుమానాలను వ్యక్తంచేశారు. ఏపీ పోలీసులపై నమ్మకం లేదని.. తన ప్రాథమిక హక్కులకు భంగం వాటిల్లేలా విచారణ సాగుతోందని... ఏపీ ప్రభుత్వానికి సంబంధంలేని స్వతంత్ర సంస్థతో దర్యాప్తు జరిపించాలని జగన్ పిటిషన్‌లో పేర్కొన్నారు.