కృష్ణానదిపై చంద్రబాబు ఇల్లు సహా అక్రమ కట్టడాల కూల్చివేత

కృష్ణానది కరకట్టపై ఉన్న అక్రమ కట్టడాలపై సీఆర్‌డీఏ ప్రకటన విడుదల చేసింది. మొత్తం 24 అక్రమ కట్టడాలకు నోటీసులిచ్చామని.. ఇందులో నిబంధనలకు విరుద్ధంగా పాతూరి నాగభూషణం నిర్మించిన కట్టడాన్ని కూల్చివేశామని అధికారులు తెలిపారు.

ఐదుగురు యజమానులు ఇచ్చిన వివరణ సంతృప్తికరంగా లేదని మిగిలిన 19 మంది ఇచ్చిన వివరణలను పరిశీలిస్తున్నామని సీఆర్‌డీఏ స్పష్టం చేసింది.

కాగా టీడీపీ అధినేత, ప్రతిపక్ష నేత చంద్రబాబు నాయుడు అద్దెకు ఉంటున్న నివాసంలో అక్రమ కట్టడాలను కూల్చివేసే ప్రక్రియను సీఆర్‌డీఏ అధికారులు సోమవారం ప్రారంభించారు.

మూడు రోజుల క్రితమే నివాసాన్ని ఖాళీ చేయాల్సిందిగా సీఆర్‌డీఏ నోటీసులు జారీ చేసింది. బాబు నివాసంతో పాటు శివస్వామి ఆశ్రమంలో ఉన్న 2 కట్టడాలు, అక్వాడెవిల్స్ పేరుతో ఉన్న కట్టడం, మరో 3 అంతస్తుల భవనాన్ని కూల్చివేసేందుకు అధికారులు సిద్ధమవుతున్నారు.