కోడెల షోరూంలో తనిఖీలు: అసెంబ్లీ ఫర్నీచర్ రికవరీ

అసెంబ్లీ ఫర్నీచర్ వివాదం నేపథ్యంలో టీడీపీ నేత, మాజీ అసెంబ్లీ స్పీకర్ కోడెల శివప్రసాద్ షోరూంలో అధికారులు మరోసారి తనిఖీలు నిర్వహించారు. వీటిని శాసనసభ ఫర్నిచర్‌గా గుర్తించిన అధికారులు అనంతరం షోరూం నుంచి తరలించారు.

మూడు రోజుల క్రితం కోడెల షోరూంలో ఇదే విషయమై అధికారులు తనిఖీలు నిర్వహించగా.. పై అంతస్తులో సోదాలు నిర్వహించేందుకు షోరూం సిబ్బంది అనుమతించలేదు.

మరోవైపు కోడెల శివప్రసాదరావు సోమవారం నాడు హైకోర్టును  ఆశ్రయించారు. అసెంబ్లీ ఫర్నీచర్ ను అప్పగించేందుకు అనుమతి ఇవ్వాలని పిటిషన్ దాఖలు చేశారు.

స్పీకర్ గా ఉన్న సమయంలో  హైద్రాబాద్ నుండి ఫర్నీచర్ ను అమరావతికి తరలించే సమయంలో కొంత ఫర్నీచర్ ను తన క్యాంప్ కార్యాలయంలో ఏర్పాటు చేసుకొన్నట్టుగా  కోడెల శివప్రసాదరావు ఒప్పుకొన్నారు.

ఫర్నీచర్ ను దారి మళ్లించారని అసెంబ్లీ సెక్షన్ ఆఫీసర్ ఈశ్వరరావు ఫిర్యాదు మేరకు ఈ నెల 23వ తేదీన తుళ్లూరు పోలీస్ స్టేషన్ లో కోడెల శివప్రసాదరావుతో పాటు ఆయన తనయుడు శివరామ్ పై కేసు నమోదైన సంగతి తెలిసిందే.