స్నేహితుల మధ్య చిచ్చుపెట్టిన బిర్యానీ... యువకుడు మృతి
అందరూ బిర్యానీ తిన్నారు. ఆ తర్వాత బిర్యానీకి బిల్లు చెల్లించే విషయమై వారి మధ్య ఘర్షణ జరిగింది. ఈ క్రమంలో అభిలాష్ అనే యువకుడిపై మిగిలిన స్నేహితులు దాడి చేశారు.
బిర్యానీ స్నేహితుల మధ్య చిచ్చు రేపింది. అప్పటి వరకు కలిసి మెలిసి ఆనందంగా ఉన్న ఫ్రెండ్స్... ఒక్కసారిగా కొట్టుకున్నారు. ఈ ఘటనలో ఓ స్నేహితుడు తీవ్రంగా గాయపడి ప్రాణాలు కోల్పోయాడు. ఈ విషాదకర సంఘటన హైదరాబాద్ నగరంలోని ముషీరాబాద్ లో చోటుచేసుకుంది.
పూర్తి వివరాల్లోకి వెళితే... నవంబర్ 25న కొందరు యువకులు మద్యం సేవించారు. ఆ తర్వాత ఓ హోటల్‌ కి వెళ్లారు. అక్కడ బిర్యానీ ఆర్డర్ చేశారు. అందరూ బిర్యానీ తిన్నారు. ఆ తర్వాత బిర్యానీకి బిల్లు చెల్లించే విషయమై వారి మధ్య ఘర్షణ జరిగింది. ఈ క్రమంలో అభిలాష్ అనే యువకుడిపై మిగిలిన స్నేహితులు దాడి చేశారు.
ఈ దాడిలో తీవ్రంగా గాయపడిన అభిలాష్‌ను పంజాగుట్టలోని నిమ్స్‌ ఆస్పత్రిలో చేర్పించారు. ఆ రోజు నుంచి చికిత్స పొందుతున్న అభిలాష్.. సోమవారం(డిసెంబర్ 30,2019) మృతిచెందాడు. దీంతో ఈ వ్యవహారం వెలుగులోకి వచ్చింది. మృతుడి కుటుంబసభ్యుల ఫిర్యాదుతో పోలీసులు కేసు నమోదు చేసుకుని విచారణ చేపట్టారు. కాగా...అభిలాష్ మృతి పట్ల అతని కుటుంబసభ్యులు కన్నీరు మున్నీరుగా విలపిస్తున్నారు. ఈ ఘటనకు గల కారకులపై చర్యలు తీసుకోవాలని డిమాండ్ చేస్తున్నారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
