ఇంట్లో తనకు ఇష్టం లేని పెళ్లి చేస్తున్నారనే కారణంతో ఓ యువతి ఇంట్లో నుంచి పరారైంది. ఈ సంఘటన కరన్‌కోట్‌ పోలీస్‌స్టేషన్‌ పరిధిలో శుక్రవారం చోటు చేసుకుంది. కరన్‌కోట్‌ పోలీస్‌స్టేషన్‌ ఏఎస్‌ఐ సత్తయ్య వివరాల ప్రకారం.. తాండూరు మండలం జినుగుర్తి గ్రామానికి చెందిన నానాపూరం హన్మంత్, అంజిలమ్మ కుమార్తె రాధిక. కొన్ని రోజులుగా రాధికకు కుటుంబసభ్యులు పెళ్లి సంబంధాలు చూస్తున్నారు. 

ఈ క్రమంలోనే బుధవారం సంబంధం కోసం ఓ గ్రామానికి వెళ్లారు. ఆ సమయంలోనే రాధిక ఇంట్లో నుంచి పారిపోయింది. అయితే యువతిని తాండూరు మండలం చింతమణిపట్నం గ్రామానికి చెందిన ఆనంద్‌ తమ కుమార్తెను తీసుకెళ్లినట్లు యువతి తల్లి ఆరోపించింది. దీంతో అతడిపై శుక్రవారం కరన్‌కోట్‌ పోలీసులకు ఫిర్యాదు చేసింది. ఈ మేరకు కేసు నమోదు చేసుకుని దర్యాప్తు చేస్తున్నట్లు ఏఎస్‌ఐ తెలిపారు. ప్రేమ వ్యవహారమే యువతి కనిపించకుండా పోవడానికి కారణమయ్యి ఉంటుందని పోలీసులు భావిస్తున్నారు. యువతి కోసం గాలిస్తున్నట్లు పోలీసులు చెప్పారు. స్నేహితులను కూడా ఆరా తీస్తున్నట్లు సమాచారం.