ప్లాస్టిక్ వల్ల కలిగే అనర్థాలు అన్నీ ఇన్నీకావు. ప్లాస్టిక్ ని వినియోగించకండి అంటూ.... ప్రభుత్వాలు నెత్తి నోరు మొత్తుకొని మరీ చెబుతున్నాయి. అంతేనా .. ప్లాస్టిక్ వాడితే.. జరిమానా విధిస్తామంటూ వార్నింగ్ లు కూడా ఇచ్చారు. కొద్ది రోజులపాటు మారినట్లే నటించడం ఆ తర్వాత మళ్లీ యాథావిథిగా ప్లాస్టిక్ ని వాడటం అలవాటైపోయింది. ఆ వాడిన ప్లాస్టిక్ ని ఎక్కడ పడితే అక్కడ పడేస్తున్నారు. దాని వల్ల వాతావరణ కాలుష్యం కూడా ఏర్పడుతోంది. అసలు ప్లాస్టిక్ భూమిలో కలవదు.. ఎన్ని సంవత్సరాలైనా అలానే ఉండిపోతుంది. దీనివల్ల చాలా సమస్యలు వస్తున్నాయి.

అయితే... ఓ కేఫ్ నిర్వాహకులు మాత్రం... ఈ ప్లాస్టిక్ ని ప్రజలు ఎక్కడ పడితే అక్కడ పడేయకుండా జాగ్రత్తలు తీసుకున్నారు. అందులో భాగంగా ప్రజలకు ఓ బంపర్ ఆఫర్ ఇచ్చారు. అరకేజీ ప్లాస్టిక్ ని కనుక తమకు అందిస్తే... వారికి ఉచిత భోజనం పెడతామని చెప్పారు. ఇంకేముంది ప్లాస్టిక్ సంచులతో జనాలు ఆ కేఫ్ ముందు బారులు తీరారు. ఈ సంఘటన ఒడిశా రాష్ట్రం భువనేశ్వర్ లో చోటుచేసుకుంది.

పూర్తి వివరాల్లోకి వెళితే... ఒడిశాలోని భువనేశ్వర్‌లో ఓ కేఫ్ నిర్వాహకులు అక్కడి రాష్ట్ర ప్రభుత్వం ప్రవేశపెట్టిన ఆహార్ స్కీంలో భాగంగా మీల్ ఫర్ ప్లాస్టిక్ అనే కార్యక్రమాన్ని ప్రారంభించారు. యునైటెడ్ నేషన్స్ డెవలప్‌మెంట్ ప్రోగ్రామ్ (యూఎన్‌డీపీ) భాగస్వామ్యంతో ఈ కార్యక్రమాన్ని కొనసాగిస్తున్నారు. ఇందులో భాగంగా భువనేశ్వర్‌లో మొత్తం 11 చోట్ల ఆహార్ సెంటర్లను ఏర్పాటు చేశారు. 

ఎవరైనా సరే ఆ నగరంలో అరకిలో ప్లాస్టిక్ వ్యర్థాలను సేకరించి ఆ సెంటర్లకు తీసుకెళ్లి ఇస్తే ఆ కేంద్రాల్లో ఉచితంగా భోజనం పొందవచ్చు. దీంతో ఓ వైపు ప్లాస్టిక్‌ను నివారించడంతోపాటు మరోవైపు నిత్యం ఆహారం కూడా పొందలేని పేదలకు కూడా సహాయం అందించిన వారమవుతామని ఈ కార్యక్రమ నిర్వాహకులు తెలిపారు.

కాగా త్వరలోనే భువనేశ్వర్‌లో మరిన్ని చోట్ల ఆహార్ కేంద్రాలను ఏర్పాటు చేయనున్నామని కార్యక్రమ నిర్వాహకులు తెలిపారు. ఈ క్రమంలో ప్రస్తుతం ఈ కార్యక్రమం సత్ఫలితాలనే ఇస్తుందని అంటున్నారు. అయితే ఇదే కార్యక్రమాన్ని ఇతర రాష్ర్టాలు కూడా ప్రేరణగా తీసుకోవాలని పలువురు పర్యావరణ వేత్తలు కోరుతున్నారు..