యూపీ పోటీ పరీక్షల్లో మార్కుల నార్మలైజేషన్ వివాదం... దీనిపై నిపుణుల అభిప్రాయం ఏంటంటే
యూపీ పీసీఎస్ పరీక్షల్లో మార్కుల సమతూకం (నార్మలైజేషన్) విషయంలో విద్యార్థులు, నిపుణుల మధ్య చర్చ జరుగుతోంది. కొంతమంది విద్యార్థులు దీన్ని వ్యతిరేకిస్తుంటే, నిపుణులు మాత్రం సానుకూల చర్యగా అభివర్ణిస్తున్నారు.
 )
Followప్రయాగరాజ్ : ఉత్తరప్రదేశ్ లోక్ సేవా ఆయోగ్ నిర్వహిస్తున్న పీసీఎస్, ఆర్ఓ/ఏఆర్ఓ ప్రిలిమ్స్ పరీక్షల్లో మార్కుల సమతూకం (నార్మలైజేషన్) గురించి విద్యావేత్తలు, నిపుణులు తమ అభిప్రాయాలు వెల్లడించారు. పరీక్ష విధానంపై ఆందోళన చెందుతున్న విద్యార్థులను ఉద్దేశించి... పోటీ పరీక్షలకు సిద్ధమవుతున్న అభ్యర్థులు ముందుగా ఈ ప్రక్రియను అర్థం చేసుకోవాలని నిపుణులు సూచిస్తున్నారు. మార్కుల నార్మలైజేషన్ ప్రక్రియ గురించి పూర్తిగా తెలుసుకున్న తర్వాతే విద్యార్థులు ఏదైనా నిర్ణయం తీసుకోవాలని వారు అంటున్నారు. పోటీ పరీక్షలకు సిద్ధమవుతున్న విద్యార్థుల నిరసనలను రాజకీయ పార్టీల కుట్రగా అభివర్ణిస్తున్నారు.
చాలా రాష్ట్రాల్లో ఈ విధానమే వుంది
అలహాబాద్ విశ్వవిద్యాలయ ప్రొఫెసర్ యోగేశ్వర్ తివారీ మాట్లాడుతూ... పోటీ పరీక్షలకు సిద్ధమవుతున్న విద్యార్థులు రోడ్డెక్కడం, గందరగోళం సృష్టించడం వంటివి ఎంతవరకు సమంజసమో ఆలోచించుకోవాలని అన్నారు. మార్కుల నార్మలైజేషన్ ప్రక్రియ గురించి పూర్తిగా తెలుసుకున్న తర్వాతే విద్యార్థులు ఏదైనా నిర్ణయం తీసుకోవాలని ఆయన సూచించారు.
ఇక ఈ నియామక ప్రక్రియపై విద్యావేత్త, కౌన్సిలర్ డాక్టర్ అపూర్వ భార్గవ మాట్లాడుతూ... ఒకే సబ్జెక్టులోని వేర్వేరు విభాగాల్లో సులభ, కఠిన ప్రశ్నలు ఉండటం వల్ల అందరికీ సమాన ప్రయోజనం ఉండదని కొందరు విద్యార్థులు వ్యతిరేకిస్తున్నారని... ఇది సరైనది కాదని అన్నారు. పరిపాలనా సేవల పరీక్షల్లో నాణ్యత మెరుగుపరచాల్సిన అవసరం ఉందని, అర్హులైన అభ్యర్థులకు అవకాశం దక్కాలంటే ఇలాంటి మార్పులు అవసరమని పేర్కొన్నారు. మార్కుల నార్మలైజేషన్ ప్రక్రియ కూడా పరీక్షల్లో నాణ్యత మెరుగుపరచడానికే అని, ఇప్పటికే చాలా రాష్ట్రాల్లో ఈ విధానం అమలులో ఉందని, కాబట్టి దీనిపై వ్యతిరేకత అర్థరహితమని అన్నారు.
మార్కుల నార్మలైజేషన్ తో విద్యార్థులకే లాభం
విద్యావేత్తలు, నిపుణులతో పాటు ప్రైవేట్ విద్యాసంస్థల నిర్వాహకులు కూడా విద్యార్థులు మార్కుల నార్మలైజేషన్ ప్రక్రియను అర్థం చేసుకోవాలని అంటున్నారు. అన్అకాడమీ ప్రయాగరాజ్ సెంటర్ హెడ్ అమిత్ త్రిపాఠి ఈ ప్రక్రియకు మద్దతు తెలిపారు. ఇది చాలాకాలం క్రితమే అమలు చేయాల్సిందని, దీనివల్ల ప్రతిభావంతులైన విద్యార్థులకే లాభమని ఆయన అన్నారు.
నీట్ పరీక్షలో కూడా ఇది అమలైందని, ఇతర రాష్ట్రాల్లో కూడా చాలా పరీక్షల్లో ఈ విధానం ఉందని, అక్కడ ఎలాంటి వ్యతిరేకత లేదని, ఇక్కడ మాత్రం ఎందుకు వ్యతిరేకిస్తున్నారో అర్థం కావడం లేదని ఆయన అన్నారు. ప్రభుత్వం ఈ ప్రక్రియలోని సానుకూల అంశాలను విద్యార్థులకు వివరించాలని ఆయన సూచించారు.
రాజకీయ పార్టీలపై విద్యార్థుల ఆగ్రహం
పోటీ పరీక్షలకు సిద్ధమవుతున్న విద్యార్థులు ఈ నిరసనలను కొన్ని రాజకీయ పార్టీలు తమ స్వార్థ ప్రయోజనాల కోసం చేస్తున్నాయని ఆరోపిస్తున్నారు. బలియాకు చెందిన అభ్యర్థి అనుజ్ సింగ్ మాట్లాడుతూ... నిరసనల్లో ఒక రాజకీయ పార్టీ నాయకుడు కూడా పాల్గొన్న వీడియో సోషల్ మీడియాలో వైరల్ అవుతోందని అన్నారు. దేవేంద్ర ప్రతాప్ అనే మరో అభ్యర్థి మాట్లాడుతూ...రాజకీయ పార్టీలు ఎక్కడైనా జనం గుమిగూడితే వారిని తమ రాజకీయ ప్రయోజనాలకు వాడుకుంటాయని, ఇక్కడ కూడా అదే జరిగిందని అన్నారు.
ఈ వివాదంపై లోక్ సేవా ఆయోగ్ కార్యదర్శి అశోక్ కుమార్ మాట్లాడుతూ... విద్యార్థుల సౌలభ్యం, వారి కోరిక మేరకే పరీక్ష నిబంధనల్లో మార్పులు చేశామని అన్నారు. ప్రైవేట్ స్కూళ్లు, కాలేజీలను పరీక్ష కేంద్రాలుగా వద్దని, పరీక్ష కేంద్రాల మధ్య దూరం ఎక్కువగా ఉండకూడదని విద్యార్థులు ఆందోళన చేసినప్పుడు వారి కోరిక మేరకే ప్రభుత్వ, ఎయిడెడ్ కాలేజీలను పరీక్ష కేంద్రాలుగా ఎంపిక చేసామన్నారు. ఈ పరీక్ష కేంద్రాల మధ్య దూరాన్ని 10 కి.మీ.గా నిర్ణయించామని ఆయన అన్నారు.
అయితే మార్కుల నార్మలైజేషన్ చాలా సాధారణ ప్రక్రియ, అనేక పరీక్షల్లో ఇది అమలవుతోందన్నారు. ఆయోగ్ కూడా నిపుణుల సలహా మేరకే ఈ ఫార్ములాను రూపొందించిందని, ఇందులో ఎలాంటి వివక్షకు తావులేదని ఆయన స్పష్టం చేశారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
