ప్రార్థనాస్థలాల్లో లౌడ్ స్పీకర్లు ... యూపీ సీఎం యోగి సంచలన వ్యాఖ్యలు
పోలీస్ అమరవీరుల సంస్మరణ దినోత్సవం సందర్భంగా ముఖ్యమంత్రి యోగి ఆదిత్యనాథ్ ఉత్తర ప్రదేశ్ పోలీసులకు గుడ్ న్యూస్ తెలిపారు అలాగే ప్రార్థనా స్థలాల్లో లౌడ్ స్పీకర్ల తొలగింపుపై కీలక వ్యాఖ్యలు చేసారు.
 )
Followలక్నో : ఉత్తర ప్రదేశ్ పోలీసులకు సీఎం యోగి ఆదిత్యనాథ్ గుడ్ న్యూస్ తెలిపారు. పోలీస్ అమరవీరుల సంస్మరణ దినోత్సవ కార్యక్రమంలో పాల్గొన్న యోగి కీలక ప్రకటన చేసారు. పోలీస్ యూనిఫామ్ భత్యంలో 70 శాతం పెంపు, బ్యారక్‌లలో నివసించే కానిస్టేబుళ్లకు వసతి భత్యంలో 25 శాతం పెంచుతున్నట్లు ప్రకటించారు. అలాగే జాతీయ, అంతర్జాతీయ క్రీడలలో పాల్గొనే పోలీసులకు శిక్షణ, ఆహారం వంటి వాటి కోసం వచ్చే ఆర్థిక సంవత్సరం బడ్జెట్‌లో రూ.10 కోట్లు కేటాయించనున్నట్లు ప్రకటించారు. ఈ ప్రకటనల ద్వారా రాష్ట్ర ప్రభుత్వంపై అదనంగా రూ.115 కోట్ల భారం పడుతుంది.
ఇక బహుళ అంతస్తుల నివాస, పరిపాలన భవనాల నిర్వహణ కోసం రూ.1,380 కోట్ల కార్పస్ ఫండ్‌ను ఏర్పాటు చేస్తున్నట్లు సీఎం యోగి ప్రకటించారు. అంతర్జాతీయ కార్యక్రమాల నిర్వహణకు పోలీసు బలగాలపై అయ్యే ఖర్చులకు సంబంధించి ప్రతిపాదిత రుసుము విధించడానికి ఆమోదం తెలిపారు. ఇది పోలీస్ డైరెక్టర్ జనరల్ ఆధ్వర్యంలో ఉంటుంది. దీనికి సంబంధించిన గౌరవ ప్రక్రియ ప్రతిపాదిత కార్పస్ నియమావళి ప్రకారం జరుగుతుంది.
115 మంది అమరుల కుటుంబాలకు రూ.36.20 కోట్ల ఆర్థిక సహాయం
కర్తవ్యాన్ని నిర్వర్తిస్తూ అమరులైన పోలీసు సిబ్బంది, భద్రతా దళాలు, భారత సైన్యంలో పనిచేసిన ఉత్తరప్రదేశ్‌కు జవాన్లకు సీఎం యోగి ఆర్థికసాయం ప్రకటించారు. మొత్తం 115 మంది అమరువీరుల కుటుంబాలకు రూ.36.20 కోట్ల ఆర్థిక సహాయం అందించినట్లు యోగి తెలిపారు. జిల్లాల్లో విధులు నిర్వహిస్తున్న పోలీసు సిబ్బంది సౌకర్యాల కోసం రూ.3.50 కోట్లు, సంక్షేమం కోసం రూ.4 కోట్లు, పనిచేస్తున్న, పదవీ విరమణ చేసిన పోలీసు సిబ్బంది కుటుంబాలకు వైద్య ఖర్చుల పరిహారం కోసం 2,66 కోట్లు, దావాల పరిష్కారానికి రూ.30.56 లక్షలు మంజూరు చేశారు.
అదేవిధంగా రూ.5 లక్షలకు పైగా వైద్య ఖర్చుల పరిహారానికి సంబంధించిన 312 కేసులకు గాను రూ.12.60 కోట్లు, 135 మంది పోలీసు సిబ్బంది, వారి కుటుంబాలకు తీవ్రమైన అనారోగ్యాల చికిత్స కోసం ముందస్తు రుణంగా రూ.5.05 కోట్లు, జీవిత బీమా పథకం కింద 306 మంది మరణించిన పోలీసు సిబ్బంది కుటుంబాలకు రూ.9.08 కోట్లు, పోలీసు సిబ్బంది, వారి కుటుంబాలు చేయించుకున్న నగదు రహిత చికిత్సల కింద రూ.31.16 లక్షలు, పోలీసు సిబ్బందికి చెందిన 205 మంది ప్రతిభావంతులైన విద్యార్థులకు విద్యా నిధి ద్వారా రూ.53.30 లక్షల స్కాలర్‌షిప్‌లు చెల్లించారు.
వెయ్యి మందికి పైగా పోలీసులకు సత్కారం
గణతంత్ర, స్వాతంత్య్ర దినోత్సవాల సందర్భంగా రాష్ట్రపతి చేతుల మీదుగా విశిష్ట సేవలకు నలుగురికి, దీర్ఘకాల సేవలకు 110 మంది అధికారులు, సిబ్బందికి పోలీస్ పతకాలు ప్రదానం చేసినట్లు సీఎం యోగి తెలిపారు. కేంద్ర హోం మంత్రిత్వ శాఖ 1,013 మంది పోలీసు సిబ్బందికి అత్యుత్తమ సేవా పతకాలు, 729 మందికి ఉత్తమ సేవా పతకాలను ప్రదానం చేసింది. ముగ్గురు గెజిటెడ్ అధికారులు, సిబ్బందికి ముఖ్యమంత్రి ఉత్తమ సేవా పోలీస్ పతకాలు అందించారు.
ఉత్తరప్రదేశ్ పోలీస్ డైరెక్టర్ జనరల్ చేతుల మీదుగా గౌరవ వేతనం, గెజిటెడ్ పోలీస్ సిబ్బందికి ఉత్తమ సేవా గుర్తింపు చిహ్నం, 455 మంది పోలీసు సిబ్బందికి ప్రశంసనీయ సేవా గుర్తింపు చిహ్నం అందజేశారు. పోలీసు సిబ్బందిని ప్రోత్సహించే ఉద్దేశ్యంతో ఉత్తరప్రదేశ్ పోలీస్ డైరెక్టర్ జనరల్ ప్రశంసా చిహ్నం (డీజీ కమెండేషన్ డిస్క్) - 29 ప్లాటినం, 51 బంగారు, 783 వెండి పతకాలను గెజిటెడ్, నాన్-గెజిటెడ్ సిబ్బందికి అందజేశారు.
గ్యాంగ్‌స్టర్ చట్టం కింద 77,811 మంది నేరస్థులపై చర్యలు
2017 తర్వాత రాష్ట్ర పోలీస్ శాఖలోని వివిధ హోదాలకు 1,54,000కు పైగా నియామకాలు జరిగాయని సీఎం యోగి తెలిపారు. వీరిలో 22,000 మందికి పైగా మహిళా సిబ్బంది ఉన్నారు. వివిధ గెజిటెడ్ హోదాలకు 1,41,000 మందికి పైగా సిబ్బందికి పదోన్నతులు కల్పించారు. ప్రస్తుతం 60,000కు పైగా హోదాలకు నియామక ప్రక్రియ కొనసాగుతోందని సీఎం తెలిపారు..
రాష్ట్రంలో శాంతి భద్రతలను నెలకొల్పడానికి గత ఏడు సంవత్సరాలలో 17 మంది జవాన్లు అసమాన ధైర్యసాహసాలు ప్రదర్శిస్తూ వీరమరణం పొందగా, 1,618 మంది పోలీసు సిబ్బంది గాయపడ్డారని సీఎం తెలిపారు. రాష్ట్రంలో నేరస్థులపై ఉక్కుపాదం మోపడానికి గ్యాంగ్‌స్టర్ చట్టం కింద 77,811 మందిపై చర్యలు తీసుకున్నామన్నారు మాఫియా, నేరస్థుల ముఠాలకు సంబంధించిన 68 కేసుల్లో సమర్థవంతమైన వాదనలు వినిపించి, 31 మంది మాఫియా నాయకులకు, వారి 66 మంది అనుచరులకు జీవిత ఖైదు శిక్ష పడేలా చేశారు. ఇద్దరికి ఉరిశిక్ష విధించామన్నారు.
మాఫియా నాయకులు, వారి ముఠా సభ్యులు సంపాదించిన రూ.4,057 కోట్ల అక్రమ ఆస్తులను జప్తు చేసినట్లు తెలిపాు. 2017 మార్చి 22 నుంచి 2024 అక్టోబర్ 2 వరకు యాంటీ రోమియో స్క్వాడ్ 1.02 కోట్లకు పైగా ప్రదేశాల్లో తనిఖీలు నిర్వహించిందని... 3.68 కోట్లకు పైగా వ్యక్తులపై చర్యలు తీసుకున్నట్లు సీఎం తెలిపారు. ఈ కాలంలో 23,375 కేసులు నమోదు చేసి, 31,517 మందిపై చట్టపరమైన చర్యలు తీసుకోగా, 1.39 కోట్లకు పైగా వ్యక్తులను హెచ్చరించి వదిలేశారన్నారు.
రాష్ట్రంలోని ప్రతి పోలీస్ స్టేషన్‌లో మహిళా బీట్‌ను రిజర్వ్ చేసి, మహిళా హెల్ప్ డెస్క్‌లను ఏర్పాటు చేశామన్నారు. అన్ని జిల్లాల్లో 15,130 మంది మహిళా పోలీసు సిబ్బందిని నియమిస్తూ, 10,378 మహిళా బీట్‌లను కేటాయించామన్నారు. ఆపరేషన్ త్రినేత్ర కింద 11.71 లక్షలకు పైగా సీసీటీవీ కెమెరాలను ఏర్పాటు చేశామన్నారు యోగి.
ప్రార్థనా స్థలాల్లో లక్షకు పైగా లౌడ్ స్పీకర్ల తొలగింపు
రాష్ట్రవ్యాప్తంగా ఒక ప్రత్యేక కార్యక్రమంలో భాగంగా మత ప్రార్థనా స్థలాల నుంచి 1,08,037కు పైగా లౌడ్ స్పీకర్లను తొలగించడం లేదా సుప్రీంకోర్టు మార్గదర్శకాల ప్రకారం వాటి శబ్దాన్ని నియంత్రించినట్లు సీఎం యోగి తెలిపారు. 2017 మే 31 నుంచి 2024 అక్టోబర్ 2 వరకు పోలీసులు 2.68 కోట్లకు పైగా ప్రదేశాల్లో ఫుట్ పెట్రోలింగ్ ద్వారా భద్రతను కల్పించారు.
ఈ పోలీస్ అమరవీరుల సంస్మరణ కార్యక్రమంలో మంత్రి అసీం అరుణ్, మేయర్ సుష్మా ఖర్క్వాల్, ప్రధాన కార్యదర్శి మనోజ్ కుమార్ సింగ్, డీజీపీ ప్రశాంత్ కుమార్, అదనపు ప్రధాన కార్యదర్శి (హోం) దీపక్ కుమార్, అదనపు పోలీస్ డైరెక్టర్ జనరల్ సుజిత్ పాండే, డివిజనల్ కమిషనర్ రోషన్ జాకబ్ తదితరులు పాల్గొన్నారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
