కర్ణాటక : రాజ్యసభ ఎన్నికల్లో విజయం .. సంబరాల్లో ‘‘పాకిస్తాన్ జిందాబాద్’’ నినాదాలు, కాంగ్రెస్‌పై బీజేపీ ఫైర్
రాజ్యసభ ఎన్నికల్లో విజయం సాధించిన అనంతరం పెద్ద వివాదం చోటు చేసుకుంది. కర్ణాటకలో కాంగ్రెస్ అభ్యర్ధి సయ్యద్ నసీర్ హుస్సేన్ మద్దతుదారులు 'పాకిస్తాన్ జిందాబాద్' అంటూ వివాదాస్పద నినాదాలు చేస్తూ విజయోత్సవ సంబరాలు జరుపుకున్నారు.
 )
Followమంగళవారం జరిగిన రాజ్యసభ ఎన్నికల్లో కర్ణాటకకు సంబంధించి అధికార కాంగ్రెస్ మూడు సీట్లు గెలుచుకోగా, బీజేపీ ఒక సీటు దక్కించుకుంది. క్రాస్ ఓటింగ్ నివేదికల మధ్య కాషాయ పార్టీకి ఎదురుదెబ్బ తగిలింది. ఎగువ సభకు అజయ్ మాకెన్, జి సి చంద్రశేఖర్, సయ్యద్ నసీర్ హుస్సేన్ కాంగ్రెస్ నుండి విజయం సాధించగా.. బిజెపి నుండి నారాయణ్స కె భాండాగే ఎన్నికయ్యారు. రాష్ట్రంలో గెలిచిన ఎమ్మెల్యేలు ఓటర్లుగా తమ ఓటు హక్కు వినియోగించుకున్నారు. నాలుగు స్థానాలకు పోటీ చేసిన ఐదుగురు అభ్యర్థుల్లో జేడీ(ఎస్)కు చెందిన డి. కుపేంద్రరెడ్డి ఓటమి పాలయ్యారు.
అయితే.. రాజ్యసభ ఎన్నికల్లో విజయం సాధించిన అనంతరం పెద్ద వివాదం చోటు చేసుకుంది. కాంగ్రెస్ అభ్యర్ధి సయ్యద్ నసీర్ హుస్సేన్ మద్దతుదారులు 'పాకిస్తాన్ జిందాబాద్' అంటూ వివాదాస్పద నినాదాలు చేస్తూ విజయోత్సవ సంబరాలు జరుపుకున్నారు. ఆ వెంటనే బిజెపి నాయకుడు , కర్ణాటక శాసనసభలో ప్రతిపక్ష నాయకుడు ఆర్ అశోక వివాదాస్పద శ్లోకాల వీడియోను ట్విట్టర్‌లో పంచుకున్నారు. "సిగ్గులేని కాంగ్రెస్ కార్యకర్తలు కర్ణాటక అసెంబ్లీలో కాంగ్రెస్ అభ్యర్థి నసీర్ హుస్సేన్ విజయాన్ని పురస్కరించుకుని పాకిస్తాన్ జిందాబాద్ నినాదాలు చేశారు ’’ అంటూ ఆగ్రహం వ్యక్తం చేశారు. ఇది సిఎం సిద్ధరామయ్య , డిప్యూటీ సిఎం డికె శివకుమార్‌ల బుజ్జగింపు రాజకీయాల ప్రమాదకరమైన గేమ్‌కు ప్రత్యక్ష నిదర్శనం. ఇది దేశ వ్యతిరేక అంశాలను, తుక్డే తుక్డే ముఠాను ప్రోత్సహించింది అని బిజెపి నేత దుయ్యబట్టారు .
ప్రతి ఎమ్మెల్యే ఓటు 100 విలువను కలిగి ఉంటుంది. అభ్యర్థి ఎన్నికను ధ్రువీకరించడానికి కనీసం 4,441 ఓట్లు అవసరం. అజయ్ మాకెన్, సయ్యద్ నసీర్ హుస్సేన్, నారాయణ్ షా కె భాండాగేలకు ఒక్కొక్కరికి 4,700 ఓట్లు రాగా.. జీసీ చంద్రశేఖర్‌కు 4500 ఓట్లు వచ్చాయి. దురదృష్టవశాత్తూ డీ.కుపేంద్ర రెడ్డి కేవలం 3600 ఓట్లతో ఓడిపోయారు. ఈ నేపథ్యంలో బీజేపీ ఎమ్మెల్యే ఎస్‌టీ సోమశేఖర్ .. అజయ్ మాకెన్‌కు అనుకూలంగా ఓటు వేయడం దుమారం రేపింది. బీజేపీకే చెందిన మరో ఎమ్మెల్యే శివరామ్ హెబ్బార్ ఓటింగ్‌కు దూరంగా వున్నారు
క్రాస్ ఓటింగ్‌కు పాల్పడిన వారిపై చట్టపరమైన చర్యలు తీసుకోవాలని, వారిపై అనర్హత వేటు వేయాల్సిందిగా స్పీకర్ యూటీ ఖాదర్‌కు ఫిర్యాదు చేయాలని బీజేపీ భావిస్తోంది. పార్టీ అభ్యర్ధికి అనుకూలంగా ఓటు వేయాలని పార్టీ జారీ చేసిన విప్‌ను ఉల్లంఘించారనే ఆరోపణలపై బీజేపీ ఈ చర్యకు సిద్ధమవుతోంది. సోమశేఖర్ క్రాస్ ఓటింగ్‌కు పాల్పడినట్లు మాకు సమాచారం అందిందని ఆర్ అశోక తెలిపారు. దీనిపై తమ లీగల్ సెల్ ప్రెసిడెంట్, హైకోర్ట్ లాయర్ అడ్వకేట్ వివేక్ రెడ్డిని సంప్రదించానని చెప్పారు. సోమశేఖర్‌పై చర్యలు ప్రారంభించాలని తాము స్పీకర్‌కు ఫిర్యాదు చేస్తామని అశోక పేర్కొన్నారు.
సోమశేఖర్ గతంలో కాంగ్రెస్ పార్టీకి రాజీనామా చేసి తర్వాత బీజేపీలో చేరారు. గత బీజేపీ ప్రభుత్వంలో మంత్రిగా , మైసూర్ ఇన్‌ఛార్జి మంత్రిగానూ ఆయన నియమితులయ్యారు. అయితే గత కొన్ని నెలలుగా సోమశేఖర్, హెబ్బార్ ఇద్దరూ బీజేపీకి దూరమై కాంగ్రెస్‌కు దగ్గరవుతున్నారు. వ్యూహాత్మక ఎత్తుగడలో భాగంగా కుపేంద్రరెడ్డి ఎన్నికకు అవసరమైన ఓట్లు లేకపోయినా.. 66 మంది ఎమ్మెల్యేలతో బీజేపీ, 19 మంది ఎమ్మెల్యేలతో జేడీ(ఎస్) సంయుక్తంగా ఆయన పేరును ప్రతిపాదించాయి. ఎన్‌డీయే భాగస్వామ్య పక్షాలు రెడ్డికి మద్దతుగా ప్రత్యర్థి కాంగ్రెస్ శిబిరం నుండి ఓట్లు పడతాయేమోనని ఎదురుచూశాయి. కాంగ్రెస్‌కు అసెంబ్లీలో 134 మంది సభ్యులు ఉండగా, ఇద్దరు స్వతంత్రులు సహా నలుగురు సభ్యులు అదనంగా ఉన్నారు.
అంతరాత్మ ప్రభోదం మేరకు తన నియోజకవర్గంలో పాఠశాలలు నిర్మించి, అభివృద్ధి పనులు చేపట్టిన కాంగ్రెస్‌కు అనుకూలంగా ఓటు వేశానని సోమశేఖర్ అన్నారు. హెబ్బార్ కూడా తన మనస్సాక్షికి కట్టుబడి ఓటింగ్‌కు దూరంగా ఉన్నట్టు చెప్పారు. అయితే ఇది 'ఆత్మ సాక్షి' (మనస్సాక్షి) కాదు, 'ఆత్మ ద్రోహం' (ఆత్మ ద్రోహం)" అని సోమశేఖర్ , హెబ్బార్ చర్యలపై బిజెపి ఎమ్మెల్సీ ఎన్ రవి కుమార్ గట్టి కౌంటరిచ్చారు . మరోవైపు.. బెంగళూరులో బీజేపీ, జేడీ(ఎస్) కార్యకర్తలు సోమశేఖర్‌కు వ్యతిరేకంగా ప్రదర్శన నిర్వహించి, నినాదాలు చేస్తూ ఆయన దిష్టిబొమ్మను దహనం చేశారు.
ఉప ముఖ్యమంత్రి, కేపీసీసీ చీఫ్ డి కె శివకుమార్ బీజేపీకి గట్టి కౌంటరిచ్చారు. బిజెపి , జెడి (ఎస్)లపై సెటైర్లు వేశారు. క్రాస్ ఓటింగ్ అంశం గురించి శివకుమార్ అసహనం వ్యక్తం చేశారు. ఇతర సభ్యులు , స్వతంత్రుల ఓట్లను తాను చూడలేదని పేర్కొన్నారు. క్రాస్ ఓటింగ్‌కు సంబంధించి స్పీకర్‌కు ఎలాంటి ఫిర్యాదులు అందడం లేదని ఆయన స్పష్టం చేశారు. సోమశేఖర్ తన మనస్సాక్షి ప్రకారం ఓటు వేశారని.. ఇది అపవిత్రమైన బిజెపి-జెడి (ఎస్) కూటమికి వ్యతిరేకంగా వేసిన ఓటు అన్నారు. సాధారణ ప్రజలు, గ్రాడ్యుయేట్లు, ఉపాధ్యాయులు కూటమిని తిరస్కరించారని డీకే దుయ్యబట్టారు. శాసనసభ్యులు ఏమనుకుంటున్నారో తర్వాత చూద్దామని ఆయన వ్యాఖ్యానించారు.
అంతకుముందు ముఖ్యమంత్రి సిద్ధరామయ్య జెడి(ఎస్)ని విమర్శించారు. ఆ పార్టీ తమ ఎమ్మెల్యేలను ప్రలోభపెట్టడానికి, బెదిరించేందుకు ప్రయత్నం చేస్తోందని ఆరోపించారు. జేడీఎస్ గెలవాలంటే 45 ఓట్లు (తమ అభ్యర్థికి) కావాలి.. వారికి ఇన్ని ఓట్లు ఉన్నాయా? తమకు సరిపడా ఓట్లు లేకపోయినా అభ్యర్థిని నిలబెట్టి ఎమ్మెల్యేలను ప్రలోభపెడుతున్నారని సీఎం ఆగ్రహం వ్యక్తం చేశారు. వారికి మనస్సాక్షి ఉందా.. అని ముఖ్యమంత్రి ప్రశ్నించారు. బెదిరింపులపై ఎఫ్ఐఆర్ నమోదు చేశామని సిద్ధరామయ్య పేర్కొన్నారు. విలేకరులతో మాట్లాడిన సిద్దరామయ్య జేడీ(ఎస్)పై విరుచుకుపడ్డారు.‘‘జేడీ(ఎస్)కి ‘ఆత్మ’ (ఆత్మ) లేనప్పుడు దానికి ‘ఆత్మ సాక్షి’ (అంతరాత్మ) ఎలా ఉంటుంది అని ప్రశ్నించారు. వారు తమను తాము జనతాదళ్ అని పిలుచుకుంటారని.. కానీ వారు ఎవరితో కలిశారు అని సీఎం నిలదీశారు.
కర్ణాటక మాజీ సీఎం హెచ్‌డీ కుమార స్వామి, కుపేంద్ర రెడ్డి అతని సహచరులపై విధానసౌధ పోలీస్ స్టేషన్‌లో ఎఫ్ఐఆర్ నమోదు చేసినట్లు సిద్ధరామయ్య తెలిపారు. ఫిర్యాదు చేసిన ఎమ్మెల్యే తనను తాను ప్రలోభపెట్టినట్లు చెప్పుకోలేదని, మరికొందరు ఎమ్మెల్యేలు దగ్గరకు వచ్చారని ఆయన చెప్పారు. మరోవైపు.. కర్ణాటక సర్వోదయ పక్షానికి చెందిన మేల్కోటే ఎమ్మెల్యే దర్శన్ పుట్టన్నయ్య కూడా తనను ఓటు అడిగిన మాట వాస్తవమేనని తెలిపారు. 19 మంది జేడీఎస్ ఎమ్మెల్యేల ఓట్లు .. తొలి ప్రాధాన్యత తర్వాత వచ్చిన అనుబంధ ఓట్ల ఆధారంగా బీజేపీ, జేడీఎస్‌లు సంయుక్తంగా కుపేంద్రరెడ్డి పేరును ప్రతిపాదించాయని కుమారస్వామి పేర్కొన్నారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
