తాను ఇష్టంగా కొనుక్కున్న ఫోన్ పాడైపోవడంతో చాలా బాధపడ్డాడు. ఫోన్ సర్వీస్ సెంటర్ కి వెళ్లి.. పాత ఫోన్ కి బదులు కొత్త ఫోన్ ఇవ్వాలని కోరాడు. అందుకు ఆ సర్వీస్ సెంటర్ అంగీకరించలేదు. అంతే.. అదే సర్వీస్ సెంటర్ ముందు ఆత్మాహుతికి పాల్పడ్డాడు. ఈ సంఘటన దేశ రాజధాని ఢిల్లీలో చోటుచేసుకోగా.. ఈ ఘటనకు సంబంధించిన పూర్తి వివరాలు ఇలా ఉన్నాయి.

దేశ రాజధాని ఢిల్లీలోని రోహినీలో ఓ యువకుడు ఆత్మాహుతికి పాల్పడ్డాడు. ప్రహ్లాద్ పూర్ గ్రామానికి చెందిన భీమ్ సింగ్ అనే వ్యక్తి కొద్ది రోజుల క్రితం ఓ కొత్త ఫోన్ కొనుగోలు చేశాడు. ఫోన్ కొన్న వారం రోజులపాటు బాగానే పనిచేసింది. ఆ తర్వాత ఏమైందో తెలీదు.. అది పాడైపోయింది. దీంతో భీమ్‌ నవంబర్‌ 6వ తేదీన సెల్‌ఫోన్‌ సర్వీస్‌ సెంటర్‌ వద్దకు వెళ్లాడు. అయితే వారు సెల్‌ఫోన్‌ను రీప్లేస్‌ చేయటం కుదరదని చెప్పారు.

మరికొన్నిసార్లు సర్వీస్‌ సెంటర్‌ చుట్టూ తిరిగినా లాభం లేకపోయింది. ఈ నేపథ్యంలో శుక్రవారం షాపు ముందు ఒంటికి నిప్పంటించుకున్నాడు. మంటల్లో తీవ్రగాయాలపాలైన అతడ్ని ఆసుపత్రికి తరలించారు. దీనిపై కేసు నమోదు చేసుకున్న పోలీసులు దర్యాప్తు చేపట్టారు. సెల్‌ఫోన్‌ తరచుగా హీటెక్కేదని, ఉన్నట్టుండి బ్యాటరీ పేలి పోయిందని బాధితుడి భార్య పూనమ్‌ పోలీసులకు తెలిపింది.