బాలీవుడ్ యాక్టర్ అక్షయ్ కుమార్ తన కెనడా పౌరసత్వాన్ని వదులుకుంటున్నట్టు వెల్లడించారు. ఇప్పటికే అందుకోసం దరఖాస్తు చేసుకున్నట్టు చెప్పారు. అసలు తాను కెనడా పౌరసత్వం ఎందుకు తీసుకున్నారో కూడా వివరించారు.
న్యూఢిల్లీ: బాలీవుడ్ స్టార్ అక్షయ్ కుమార్ సంచలన నిర్ణయం తీసుకున్నారు. కెనడా పౌరసత్వం మూలంగా తరుచూ విమర్శలు ఎదుర్కొనే అక్షయ్ కుమార్ తాజాగా ఓ ఇంటర్వ్యూలో మాట్లాడుతూ తనకు సర్వం భారతే అని వివరించారు. తన పాస్పోర్టు చేంజ్ చేసుకోవడానికి ఇప్పటికే దరఖాస్తు చేసుకున్నారని తెలిపారు. కెనడా పౌరసత్వాన్ని వదులుకుంటున్నట్టు చెప్పారు.
ఆజ్తక్ చానెల్ సీదీ బాత్ అనే కొత్త సీజన్ ప్రారంభించింది. ఇందులో ఫస్ట్ ఎపిసోడ్లో ఇంటర్వ్యూ ఇస్తూ అక్షయ్ కుమార్ ఈ మేరకు వెల్లడించారు. తాను కెనడా పౌరసత్వాన్ని ఎందుకు తీసుకోవాల్సి వచ్చిందో తెలుసుకోకుండా కొందరు ఇష్టం వచ్చినట్టు మాట్లాడుతుండటం తనను బాధిస్తుందని అన్నారు.
‘ఇండియానే నాకు సర్వం.. నేను ఏం సంపాదించినా.. సాధించినా.. అన్నీ ఇక్కడి నుంచే. పొందిన దాని నుంచి తిరిగి చెల్లించే సౌభాగ్యం కూడా నాకు దక్కింది. కానీ, ఏమీ తెలియకుండా కొందరు మాట్లాడే మాటలు చాలా బాధిస్తాయి’ అని 55 ఏళ్ల అక్షయ్ కుమార్ చెప్పారు.
హేరా ఫేరీ, నమస్తే లండన్, టాయిలెట్: ఏక్ ప్రేమ్ కథా, ప్యాడ్మ్యాన్ వంటి సినిమాలతో అలరించిన అక్షయ్ కుమార్ కెరీర్ డల్ అయినప్పుడు 15 సినిమాలు ఫ్లాప్ అయ్యాయి. అది 1990ల కాలంలో జరిగింది. బాక్స్ ఆఫీసు దగ్గర తన సినిమాలు వరుసగా బోల్తా కొట్టడంతో తాను కెనడా పౌరసత్వానికి దరఖాస్తు చేసినట్టు అక్షయ్ కుమార్ తాజాగా వివించారు.
"నాకు ఏమనిపించిందంటే.. భాయ్.. ఇక సినిమాలు వర్కవుట్ కావట్లేదు. వేరే ఇంకేదైనా పని చూసుకోవాలి’ అనిపించింది. అందుకే కెనడాకు పని కోసం వెళ్లాను. నా ఫ్రెండ్ ఒకరు కెనడాలో ఉన్నారు. నన్ను అక్కడకు రమ్మన్నాడు. అంతే.. నేను పౌరసత్వానికి దరఖాస్తు చేసుకున్నాను. అక్కడికి వెళ్లాను" అని వివరించారు.
ఆ సమయంలో కేవలం మరో రెండు సినిమాలు మాత్రమే విడుదల కావాల్సి ఉన్నాయని, అప్పుడే తన లక్కు తిరిగిందని, ఆ రెండు సినిమాలు సూపర్ హిట్ అయ్యాయని వివరించారు. దీంతో మరికొన్ని సినిమా ఆఫర్లు వచ్చాయని, అప్పటి నుంచి వరుసగా సినిమాలు చేస్తూనే ఉన్నారని పేర్కొన్నారు. తన ఫ్రెండ్ కూడా వెనక్కి వెళ్లి పని చేసుకో అన్నారని వివరించారు. ఆ తర్వత తాను ఆ పాస్పోర్టు గురించి మరిచిపోయానని చెప్పారు. దీన్ని కచ్చితంగా మార్చుకోవాలనే ఆలోచన కూడా తనకు తట్టలేదని అన్నారు. ఇప్పుడు మార్చుకోవడానికి దరఖాస్తు చేసుకున్నానని తెలిపారు. కెనడా పౌరసత్వం వదులుకుంటున్నానని పేర్కొన్నారు.
2019 లోక్ సభ ఎన్నికలకు ముందు ప్రధానమంత్రి నరేంద్ర మోడీ ఇంటర్వ్యూ చేసినప్పుడు అక్షయ్ కుమార్ పౌరసత్వం పై దుమారం రేగింది.
