ఎఐఎడీఎంకె కీలక నిర్ణయం:ఎన్‌డీఏ కూటమికి గుడ్‌బై
ఎన్ డీఏ తో అన్నాడీఎంకె తెగదెంపులు చేసుకుంది. ఇవాళ జరిగిన అన్నాడీఎంకె కార్యవర్గ సమావేశంలో అన్నాడీఎంకే ఈ మేరకు తీర్మానం చేసింది.
చెన్నై: ఎన్‌డీఏ కూటమికి అన్నాడీఎంకె గుడ్ బై చెప్పింది. సోమవారంనాడు జరిగిన ఎఐఏడీఎంకె కార్యవర్గ సమావేశంలో ఈ మేరకు ఏకగీవ్రంగా తీర్మానం చేశారు. గత కొంతకాలంగా రాష్ట్రంలో బీజేపీ నేతలు అన్నాడిఎంకె నేతలపై విమర్శలు చేస్తున్నారని ఆ పార్టీ ఆరోపిస్తుంది. ఎన్‌డీఏ నుండి బయటకు రావడానికి బీజేపీ నేతల వైఖరే కారణమని ఎఐఏడీఎంకె నేతలు ప్రకటించారు.
బీజేపీతో పొత్తుపై చర్చించేందుకు ఎఐఏడీఎంకె ప్రధాన కార్యదర్శి కె. పళనిస్వామి అధ్యక్షతన ఆయా జిల్లాల్లోని పార్టీ కార్యదర్శులు, ఎమ్మెల్యేలు,ఇతర కీలక నేతలతో సోమవారంనాడు ఆ పార్టీ సమావేశం నిర్వహించింది.అన్నాడీఎంకెపై బీజేపీ తమిళనాడు రాష్ట్ర శాఖ ఉద్దేశ్యపూర్వకంగా విమర్శలు చేయడాన్ని అన్నాడీఎంకె సమావేశం తప్పుబట్టింది. బీజేపీతో తెగదెంపులు చేసుకోవాలని అన్నాడీఎంకె సమావేశంలో ఏకగ్రీవంగా తీర్మానం చేసిన తర్వాత ఆ పార్టీ కార్యాలయం వెలుపల సంబరాలు చేసుకున్నారు కార్యకర్తలు.
బీజేపీ రాష్ట్ర నాయకత్వంపై అన్నాడీఎంకె నేతలు మండిపడ్డారు. ఈ విషయమై బీజేపీ కేంద్ర నాయకత్వానికి ఫిర్యాదు చేసినా పట్టించుకోలేదని ఆ పార్టీ ఆరోపించింది. బీజేపీ తమిళనాడు రాష్ట్ర అధ్యక్షుడు అన్నామలై క్షమాపణలు చెప్పాలని కోరుతూ ఆ పార్టీ నేతలు శుక్రవారంనాడు జేపీ నడ్డా,పీయూష్ గోయల్ లను కలిశారు. రాష్ట్రంలో చోటు చేసుకున్న పరిణామాలను వివరించారు.
