Follow Us;Resize=(820,462) "Microsoft")
ఏఐ టూల్స్ వినియోగం పెరిగిన నేపథ్యంలో మైక్రోసాఫ్ట్ 6 వేల మంది ఉద్యోగులను తొలగించింది. వీరిలో ఎక్కువ మంది సాఫ్ట్‌వేర్ ఇంజినీర్లే.
ప్రపంచ ప్రఖ్యాత టెక్నాలజీ దిగ్గజం మైక్రోసాఫ్ట్ తాజాగా 3 శాతం ఉద్యోగులను తొలగించడంతో దాదాపు 6,000 మందిపై ప్రభావం పడింది. కృత్రిమ మేధ (ఏఐ) వినియోగాన్ని సంస్థలో పెంచే దిశగా మార్పులు చేపట్టిన మైక్రోసాఫ్ట్, సిబ్బందిని తగ్గిస్తూ ఈ చర్యలు చేపట్టింది. ఈ తొలగింపుల్లో ఎక్కువగా సాఫ్ట్‌వేర్ ఇంజినీర్లు ఉన్నట్టు అంతర్జాతీయ మీడియా వెల్లడించింది.
వాషింగ్టన్‌లో ఉన్న కార్యాలయంలో తొలగించిన సిబ్బందిలో సుమారు 40 శాతం మంది సాఫ్ట్‌వేర్ విభాగానికి చెందినవారే. సంస్థ గత కొన్ని నెలలుగా ఏఐ సాధనాలపై దృష్టి పెడుతూ, ఉద్యోగులను వాటి వినియోగంపై దృష్టిపెట్టమని సూచించింది. ఈ సూచనల ఆధారంగా కొంతమంది ఉద్యోగులు ఏఐ ఆధారిత టూల్స్‌ను అభివృద్ధి చేశారు. కానీ అదే టూల్స్ తరువాత వారి ఉద్యోగాలను భర్తీ చేయడంలో ఉపయోగించడం జరిగింది.
మైక్రోసాఫ్ట్ టాప్ ఎగ్జిక్యూటివ్ జెఫ్ హల్స్ తన బృందంలోని సుమారు 400 మందికి ఓపెన్‌ఏఐ చాట్‌బాట్‌లను ఉపయోగించి 50 శాతం కోడ్‌ను పూర్తిచేయాలని కొన్ని వారాల క్రితం సూచించారు. ఇప్పుడు ఈ బృందం సైతం తొలగింపులో భాగమైంది. తమే రూపొందించిన టెక్నాలజీ కారణంగా ఉద్యోగాలు పోవడం అనేది ఉద్యోగుల మధ్య ఆందోళనకు దారితీసింది.
Related Articles
జూనియర్ కోడర్లు, ప్రొడక్ట్ మేనేజర్లు, టెక్నికల్ ప్రోగ్రామ్ మేనేజర్లు, ఏఐ ప్రాజెక్టుల్లో పనిచేస్తున్న సిబ్బంది ఈ తొలగింపులతో ప్రభావితులయ్యారు. ప్రత్యేకంగా మైక్రోసాఫ్ట్‌కి చెందిన ఓ స్టార్టప్‌లో ఏఐ డైరెక్టర్‌గా ఉన్న గాబ్రియెలా డికీరోజ్ తన పదవిని కోల్పోయారు. దీనిపై స్పందిస్తూ, సంస్థ కోసం ఎంతో కృషి చేసిన వారు ఉద్యోగాలు కోల్పోతున్న తీరుపై విచారం వ్యక్తం చేశారు.
2023లో మైక్రోసాఫ్ట్ 10 వేల మందిని తొలగించిన సంగతి తెలిసిందే. తాజా ఉద్వాసనలు సంస్థ చరిత్రలో రెండో అతిపెద్దగా నిలిచాయి. మైక్రోసాఫ్ట్ ప్రతినిధి మాట్లాడుతూ, సంస్థ పనితీరును మెరుగుపర్చడమే లక్ష్యంగా కొన్ని కీలక మార్పులు చేస్తున్నామని తెలిపారు. మేనేజ్‌మెంట్ స్థాయిలను తగ్గిస్తూ, వ్యయాన్ని నియంత్రించాలనే ఉద్దేశంతో ఈ చర్యలు తీసుకున్నామని వివరించారు.
ఇంతకముందు, మైక్రోసాఫ్ట్ సీఈఓ సత్యనాదెళ్ల మాట్లాడుతూ, తమ సంస్థలో ప్రస్తుతం 30 శాతం కోడింగ్‌ను ఏఐ ఆధారిత టూల్స్ సాయంతోనే నిర్వహిస్తున్నట్టు వెల్లడించారు. నాణ్యతను మెరుగుపర్చడంలో ఏఐ కీలక పాత్ర పోషిస్తోందని చెప్పారు. ఈ వ్యాఖ్యల తరువాత కొన్ని వారాల వ్యవధిలోనే ఉద్యోగుల తొలగింపు ప్రకటన రావడం గమనార్హం.
ఈ పరిణామాలు టెక్ రంగంలో ఏఐ ప్రభావం ఎంత వేగంగా పెరుగుతోందో స్పష్టంగా చూపిస్తున్నాయి.
