కంటికి రెప్పలా కాపాడాల్సిన తండ్రే.. కామాంధుడిలా మారిపోయాడు. రక్తం పంచుకుపుట్టిన ముగ్గురు కూతుళ్ల రక్తం పీల్చుకుతినే రాక్షసుడిలా ప్రవర్తించారు. ముగ్గురిని నానా రకాలుగా హింసించి.. ప్రతి రోజూ లైంగికంగా బాధించేవాడు. కాగా... తండ్రి క్రూరత్వం నుంచి బయటపడే మార్గం లేక... ఆ ముగ్గురు అక్కాచెల్లెళ్లు.. కన్న తండ్రిని చంపేశారు. ఈ  సంఘటన రష్యాలో చోటుచేసుకుంది. ఈ ఘటన 2018లో చోటుచేసుకోగా..తాజాగా ఈ కేసు న్యాయస్థానం ముందుకు వచ్చింది.

పూర్తి వివరాల్లోకి వెళితే...రష్యాకు చెందిన క్రెస్టీనా(20), ఏంజిలీనా(19), మారియా క్యాథరీన్(18) అనే ముగ్గురు అక్కాచెల్లెళ్లు తమ తండ్రి మైఖేల్‌తో కలిసి నివసించేవారు. అయితే మైఖేల్‌ ఎల్లప్పుడూ వారిని శారీరంగా హింసిస్తూ.. లైంగిక వేధింపులకు గురిచేసేవాడు. ఈ క్రమంలో తండ్రిపై పోలీసులకు ఫిర్యాదు చేసినా ఫలితం లేకుండా పోయింది. రష్యాలో గృహహింసకు సంబంధించి ఎటువంటి ప్రత్యేక చట్టం లేకపోవడంతో అతడి ఆగడాలు మరింతగా పెరిగాయి.

ఈ నేపథ్యంలో తండ్రిపై ద్వేషం పెంచుకున్ను అక్కాచెల్లెళ్లు ముగ్గురు గతేడాది జూలైలో అతడిని హత్య చేశారు. కత్తితో పలుమార్లు దాడి చేసి.. సుత్తితో కొట్టి చంపారు. దీంతో పోలీసులు వారిని అరెస్టు చేశారు. ఈ క్రమంలో కేసుకు సంబంధించిన అన్ని ఆధారాలు సంపాదించినట్లు విచారణ అధికారులు మంగళవారం పేర్కొన్నారు. 

ఈ మేరకు క్రెస్టీనా, ఏంజెలీనాపై కేసు నమోదు చేసినట్లు వెల్లడించారు. వారిద్దరూ ఉద్దేశపూర్వకంగానే తండ్రి మైఖేల్‌ను హత్య చేసినట్లు కోర్టుకు తెలిపారు. అంతేగాక మారియాకు సైక్రియాట్రిస్ట్‌తో చికిత్స అందించాలని సూచించారు. ఈ క్రమంలో క్రెస్టీనా, ఏంజెలీనాకు 20 ఏళ్ల జైలు శిక్ష పడే అవకాశం ఉంది. ఈ నేపథ్యంలో రష్యా చట్టాలపై విమర్శలు వెల్లువెత్తుతున్నాయి. 

ఆ యువతులు చేసిన పనిలో తప్పేమి లేదని పలువురు అభిప్రాయపడుతున్నారు. దేశంలో గృహ హింస చట్టం ఉండి ఉంటే వాళ్లు ఈ నిర్ణయం తీసుకొని ఉండేవారు కదా అని పలువురు ప్రశ్నిస్తున్నారు. మా సిస్టర్స్ ని వదిలేయండి అంటూ అందరూ ప్లకార్డ్స్ పట్టుకొని నినాదాలు చేయడం గమనార్హం. మరి న్యాయస్థానం ఎలాంటి తీర్పు ఇస్తుందో చూడాలి.