Tamilnadu Results 2026 : తిరుమలలో త్రిష.. లీడింగ్ లో విజయ్
తమిళనాడు అసెంబ్లీ ఎన్నికల్లో ఆసక్తికర ఫలితాలు వెలువడుతున్నాయి. త్రిష తిరుమల శ్రీవారి సన్నిధిల్లో ఉన్నవేళ విజయ్ విజయం దిశగా దూసుకుపోవడంపై తీవ్ర చర్చ సాగుతోంది.
విజయం దిశగా విజయ్ అడుగులు..
Tamilnadu Assembly Election Results 2026 : దేశవ్యాప్తంగా ప్రస్తుతం పొలిటికల్ హీట్ కొనసాగుతోంది... వివిధ రాష్ట్రాల అసెంబ్లీ ఎన్నికల ఫలితాలు వెలువడుతున్నాయి. ముఖ్యంగా తమిళనాడు, పశ్చిమ బెంగాల్ అసెంబ్లీ ఎన్నికలపై ఉత్కంఠ కొనసాగుతోంది... ఈ రెండు రాష్ట్రాల్లోనూ అధికార పార్టీలకు పరాభవం తప్పేలా లేదు.
తమిళనాడు అసెంబ్లీ ఎన్నికల కౌంటింగ్లో నటుడు విజయ్ 'తమిళగ వెట్రి కళగం' పార్టీ అందరినీ ఆశ్చర్యపరుస్తోంది. మొదట్లో విజయ్ ను తక్కువ అంచనా వేసినా.. ఎగ్జిట్ పోల్స్ భారీ విజయాన్ని అంచనా వేశాయి. ఫలితాల్లోనూ ఇదే బైటపడుతోంది... ఇప్పటికే టివికే స్పష్టమైన ఆధిక్యంలో కొనసాగుతోంది... ప్రభుత్వాన్ని ఏర్పాటుచేసే అవకాశాలు కూడా స్పష్టంగా కనిపిస్తున్నాయి.
తిరుమలలో త్రిష...
ఓవైపు తమిళనాడు ఎన్నికల ఫలితాలు వెలువడుతున్నవేళ హీరోయిన్ త్రిష తిరుమల వెంకటేశ్వర స్వామిని దర్శించుకున్నారు. హీరో విజయ్ పార్టీ టివికే విజయం దిశగా దూసుకెళుతున్నవేళ త్రిష పూజలు ప్రాధాన్యం సంతరించుకున్నాయి. విజయ్ విజయం కోసమే త్రిష తిరుమల శ్రీవారిని దర్శించుకున్నారనే ప్రచారం సోషల్ మీడియాలో జోరుగా సాగుతోంది.
ఇవాళ త్రిష పుట్టినరోజు... ఇదే రోజు విజయ్ విజయం దిశగా దూసుకెళ్లడం ఆసక్తికరం. తిరుమల శ్రీవారిని దర్శనానికి వెళుతున్నట్లు త్రిష నిన్న ఆదివారమే ఇన్స్టాగ్రామ్ లో పోస్ట్ చేసింది. అప్పటినుండి విజయ్ కోసమే ఆమె తిరుమల వెళుతున్నట్లు ప్రచారం జరిగింది. ఇప్పుడు త్రిష పూజల పలితంగానే విజయ్ గెలవబోతున్నాడని అభిమానుల్లో ఆసక్తికర చర్చ సాగుతోంది.
విజయ్ పార్టీ.. తొలి ఎన్నికల్లోనే సంచలనమా?
తమిళ రాజకీయాల్లో కొత్త శక్తిగా వచ్చిన నటుడు విజయ్ నేతృత్వంలోని 'తమిళగ వెట్రి కళగం' (టీవీకే) ఈ ఎన్నికల్లో అందరి దృష్టిని ఆకర్షిస్తోంది. పార్టీ పెట్టిన కొన్ని నెలల్లోనే, పోటీ చేసిన మొదటి ఎన్నికల్లోనే అధికారాన్ని అందుకుంటుందా..? అనే ప్రశ్న రాజకీయ వర్గాల్లో పెద్ద చర్చనీయాంశంగా మారింది. ఇప్పుడు పెరంబూర్, తిరుచ్చి ఈస్ట్ నియోజకవర్గాల్లో విజయ్ ఆధిక్యంలో కొనసాగుతున్నారు. అలాగే ఆయన పార్టీ అభ్యర్థులు అత్యధిక స్థానాల్లో ఆధిక్యంలో కొనసాగుతున్నారు. దీంతో TVK, AIADMK కలిసి ప్రభుత్వాన్ని ఏర్పాటుచేసే అవకాశాలు కనిపిస్తున్నాయి.
ఎన్నికలకు ముందు వరకు, టీవీకే ఒక్క సీటు కూడా గెలవదని విమర్శలు వచ్చాయి. కానీ ఆ తర్వాత వచ్చిన ఎగ్జిట్ పోల్స్ ఈ అంచనాలను పూర్తిగా మార్చేశాయి. కొన్ని ప్రముఖ మీడియా సంస్థలు ముఖ్యంగా ఇండియా టుడే, టీవీకే పార్టీ 92 నుంచి 120 సీట్ల వరకు గెలిచే అవకాశం ఉందని అంచనా వేసింది. అంతేకాకుండా రిటైర్డ్ ఐపీఎస్ అధికారి రవి విడుదల చేసిన సర్వేలో ఏకంగా 121 సీట్లు వస్తాయని తేలింది.
విజయ్ వ్యూహాలు, నమ్మకం..
పార్టీని ప్రారంభించినప్పటి నుంచి విజయ్ తన టీమ్ను బలోపేతం చేయడంపై తీవ్రంగా దృష్టి పెట్టారు. గెలిచిన వెంటనే అందరూ పనైయూర్కు రావాలని ఆయన ఇచ్చిన పిలుపు, పార్టీ కార్యకర్తల్లో మరింత విశ్వాసాన్ని నింపింది. అభ్యర్థులు కూడా తాము గెలుస్తామనే ధీమాతో ఉన్నారు.
పెరంబూర్, తిరుచ్చి ఈస్ట్: తొలి ఆధిక్యం
ప్రస్తుత ఓట్ల లెక్కింపులో, పెరంబూర్, తిరుచ్చి ఈస్ట్ నియోజకవర్గాల్లో విజయ్ ఆధిక్యంలో ఉన్నారు. పెరంబూర్లో ఆయన తక్కవ ఓట్లతోనే అయినా ముందంజలో ఉండగా, డీఎంకే అభ్యర్థి ఆర్.టి. శేఖర్ వెనుకంజలో ఉన్నారు. తిరుచ్చి ఈస్ట్లో కూడా విజయ్ ఆధిక్యం కనబరచడం ఎన్నికల ఫలితాలపై మరింత ఆసక్తిని రేపుతోంది.
