మీ రైల్వే టికెట్లు బుక్ అవ్వట్లేదా? సమస్య ఇదే 

 ఇండియన్ రైల్వే టికెట్ బుకింగ్స్ లో సమస్యలు ఎదురవుతున్నాయి. ఐఆర్ సిటిసి వెబ్ సైట్ డౌన్ కావడంతో ఈ సమస్య తలెత్తింది. 

IRCTC

IRCTC (Indian Railway catering and tourism Corporation) అధికారిక వెబ్ సైట్ లో సమస్యలు తలెత్తాయి. దీంతో రైల్వే టికెట్లు బుక్ చేసుకోవాలనుకునే ప్రయాణికులు ఇబ్బంది పడుతున్నారు. ఈ విషయాన్ని ప్రయాణికులు సోషల్ మీడియా ద్వారా ఫిర్యాదు చేస్తున్నారు. 

ప్రస్తుతం పండగల సీజన్ కావడంతో చాలామంది రైల్వేలో ప్రయాణికుల సంఖ్య పెరిగింది. క్రిస్మస్ పండగ ముగియడంతో సొంతూళ్లకు వెళ్లినవారు తిరుగుప్రయాణం అవుతున్నారు. అలాగే న్యూ ఇయర్ సందర్భంగా చాలామంది హాలిడే ప్రయాణానికి సిద్దమయ్యారు. ఇక సంక్రాంతి సెలవుల నేపథ్యంలో సొంతూళ్లకు వెళ్లేందుకు సిద్దమవుతున్నారు. 

అయితే చివరి నిమిషంలో టికెట్లు దొరకవు కాబట్టి ముందునుండే రైల్వే టికెట్ల బుకింగ్ కు ప్రయత్నిస్తున్నారు. కానీ తరచూ ఇలా ఐఆర్ సిటిసి వెబ్ సైట్ డౌన్ అవుతుండటంతో వీరు తీవ్ర ఇబ్బంది పడుతున్నారు. ఈ నెలలో ఐఆర్ సిటిసి వెబ్ సైట్ లో సమస్య తలెత్తడం ఇది రెండోసారి. 

తెలుగు ప్రజలకు మరీముఖ్యంగా ఆంధ్ర ప్రదేశ్ లో సంక్రాంతి చాలా పెద్ద పండగ. దేశ విదేశాల్లో ఎక్కడెక్కడో స్థిరపడినవారు కూడా ఈ పండక్కి సొంతూళ్లకు వెళుతుంటారు. దీంతో ఇప్పటినుండే వాళ్లు రైళ్లు, బస్ టికెట్స్ బుక్ చేసుకుంటున్నారు. ఇలాంటి సమయంలో ఐఆర్ సిటిసి వెబ్ సైట్ డౌన్ అవుతుండటం వారిని ఆందోళనకు గురిచేస్తోంది. వెంటనే రైల్వే శాఖ ఈ సమస్యకు శాశ్వత పరిష్కారం కనుగొనాలని సూచిస్తున్నారు.