కంగువా తో నిండా మునిగిన సూర్య, చేజారిన క్రేజీ మూవీ 

హీరో సూర్య నటించిన కంగువ సినిమా భారీ అంచనాల నడుమ నవంబర్ 14న ప్రపంచవ్యాప్తంగా 11,500 థియేటర్లలో 38 భాషల్లో విడుదలైంది.  ఆర్టిఫిషియల్ ఇంటెలిజెన్స్ సాంకేతికతను ఉపయోగించి మిగిలిన 37 భాషల్లో డబ్బింగ్ చేశారు. ప్రపంచవ్యాప్తంగా 2000 కోట్ల వరకు వసూలు చేస్తుందని అంచనా వేశారు. కానీ కంగువ సినిమా, ఇప్పుడు 350 కోట్లను కూడా దాటలేకపోతోంది. డిసెంబర్‌లో ఈ సినిమా OTTలో నేరుగా విడుదల కానుంది.

ఇటీవల ఈ సినిమా నిర్మాణ సంస్థ అయిన స్టూడియో గ్రీన్ సంస్థ అధినేత, నిర్మాత దనంజయన్ ఒక సంచలన ఆరోపణ చేశారు. తమిళ సినిమాలోని ఇద్దరు అగ్ర నటుల అభిమానులే కంగువ సినిమాను ఉద్దేశపూర్వకంగా దెబ్బ తీశారని ఆయన అన్నారు. అంతేకాకుండా నటుడు సూర్య మాట్లాడే రాజకీయాలు ఇష్టంలేని ఇద్దరు ప్రముఖ రాజకీయ నాయకులు కూడా ఈ సమస్యకు కారణమని సంచలన ఆరోపణ చేశారు. ఈ నేపథ్యంలో "పురనానూరు" సినిమాను సూర్య ఎందుకు వదులుకున్నారనే దాని గురించి వలైపేచు యూట్యూబ్ ఛానెల్ ప్రముఖులు మాట్లాడారు.

వలైపేచు యూట్యూబ్ ఛానెల్‌లో వెల్లడించిన సమాచారం ప్రకారం, పురనానూరు సినిమాను సూర్య పూర్తి చేసిన తర్వాతే బాలీవుడ్‌లో భారీ బడ్జెట్‌తో నిర్మితమవుతున్న కర్ణ సినిమాలో నటించడానికి సూర్య సిద్ధంగా ఉన్నారని, అయితే పురనానూరు సినిమా ఇతివృత్తం హిందీని వ్యతిరేకిస్తుంది కాబట్టి, సూర్య ఆ సినిమాలో నటించడం అంత సముచితం కాదని, ఆ సినిమాలో నటించి ఆయన బాలీవుడ్ సినిమాలో ఎలా నటించగలరని జ్యోతిక, సూర్య చర్చించుకుని, కర్ణ సినిమా కోసం పురనానూరు సినిమాను సూర్య వదులుకున్నారని వలైపేచు కార్యక్రమంలో ప్రసారమైన వీడియోలో చెప్పారు.   

ఇప్పుడు కర్ణ సినిమా నిర్మాణం అనుమానాస్పదంగా మారడంతో, మళ్ళీ సుధా కొంగరను పిలిచి మాట్లాడిన నటుడు సూర్య, ఆ సినిమాలో మళ్ళీ చేరడానికి ఆసక్తిగా ఉన్నానని చెప్పారట. కానీ ఇంతకు ముందే సూర్య వద్దని చెప్పడం, శివకార్తికేయన్ ఈ సినిమాలో నటించడానికి ఒప్పుకోవడంతో సుధా కొంగర సూర్యకు నో చెప్పారని వలైపేచులో వెల్లడించారు. మరి ఈ వార్తల్లో నిజమెంతో తెలియదు.