నారా లోకేష్ కి ఇష్టమైన హీరో ఎవరో తెలుసా, ఒక్క కారణం వల్లే అతనికి ఫ్యాన్, ఆ మూవీకి 4.5 రేటింగ్

Nara Lokesh favourite hero: నారా లోకేష్ తనకి ఇష్టమైన హీరో ఎవరో చెప్పేశారు. ఆ హీరో నటించిన ఒక చిత్రానికి నారా లోకేష్ ఏకంగా 4.5 రేటింగ్ ఇవ్వడం విశేషం 

Nara Lokesh

ఏపీ మంత్రి నారా లోకేష్ చేసే ప్రతి కామెంట్ సోషల్ మీడియాలో వైరల్ అవుతూ ఉంటుంది. గత సార్వత్రిక ఎన్నికల్లో మంగళగిరి నుంచి విజయం సాధించిన నారా లోకేష్ ఎమ్మెల్యేగా, మంత్రిగా ప్రాతినిధ్యం వహిస్తున్నారు. తాజాగా నారా లోకేష్ తన పార్టీకి చెందిన కీలక నేత, కేంద్ర మంత్రి రామ్మోహన్ నాయుడుతో కలసి ఇండియా టుడే కాన్ క్లేవ్ లో పాల్గొనడానికి ఢిల్లీ వెళ్లారు. 

ఈ సందర్భంగా నారా లోకేష్, రామ్మోహన్ నాయుడు సరదాగా ఓ ర్యాపిడ్ ఫైర్ ఇంటర్వ్యూలో పాల్గొన్నారు. ఈ ఇంటర్వ్యూలో రామ్మోహన్ నాయుడు, నారా లోకేష్ ఆంధ్ర వంటకాల్లో ఇష్టమైనవి, ఇష్టమైన ప్రదేశాల గురించి మాట్లాడారు. తనకి ఏపీలో ఉలవచారు, ఉలవచారు బిర్యానీ అంటే ఇష్టం అని లోకేష్ పేర్కొన్నారు. అన్ని ప్రశ్నలకు వెంటవెంటనే సమాధానాలు ఇచ్చిన లోకేష్ కి చివర్లో మాత్రం పరీక్ష ఎదురైంది. 

తెలుగులో మీకు ఇష్టమైన హీరో ఎవరో చెప్పండి అని యాంకర్ అడిగారు. లోకేష్ ని మరింత ఇరకాటంలో పెట్టే విధంగా చిరంజీవి, బాలకృష్ణ, పవన్ కళ్యాణ్ లలో ఒక్కరి పేరే చెప్పాలని అడిగారు. దీనితో నారా లోకేష్ తప్పించుకునేందుకు 'ఆల్ ఆఫ్ ది ఎబౌ' అని సమాధానం ఇచ్చారు. ఒక్కరి పేరే చెప్పాలని యాంకర్ కోరడంతో నేను బాలయ్య బాబు అభిమానిని అని సమాధానం ఇచ్చారు. తెలుగులో మాస్ మహారాజ్ ని కూడా మరచిపోలేము అని నారా లోకేష్ అన్నారు. మీరు లేటెస్ట్ గా చూసిన చిత్రం ఏంటి అని అడగగా.. లోకేష్ వెంటనే డాకు మహారాజ్ అని సమాధానం ఇచ్చారు. 

డాకు మహారాజ్ చిత్రానికి తాను 5కి 4.5 రేటింగ్ ఇస్తానని తెలిపారు. రామ్మోహన్ నాయుడు కూడా తనకి ఇష్టమైన హీరో చిన్నప్పటి నుంచి బాలయ్య బాబే అని సమాధానం ఇచ్చారు. మరి పవన్ కళ్యాణ్ సంగతేంటి అని యాంకర్ ఇరుకునపెట్టే ప్రయత్నం చేయగా.. ఆయన నాకు పర్సనల్ గా తెలుసు, మంచి నటుడు అని రామ్మోహన్ నాయుడు తెలిపారు. 

గతంలో కూడా నారా లోకేష్ బాలయ్య, చిరంజీవి గురించి కామెంట్స్ చేశారు. ఓ పబ్లిక్ మీటింగ్ లో లోకేష్ మాట్లాడుతూ నేను మెగాస్టార్ చిరంజీవి అభిమానిని. కానీ ఎంతైనా ముద్దుల మావయ్య వైపే చూస్తాం కదా. బాలయ్య బాబు అన్ స్టాపబుల్. ఆయన సినిమా ఎప్పుడు రిలీజ్ అయినా ఫస్ట్ డే ఫస్ట్ షో చూస్తానని లోకేష్ తెలిపారు. రాజకీయాల్లోకి రాకముందు నారా లోకేష్ ని హీరోగా ఇంట్రడ్యూస్ చేయాలనే ప్రయత్నాలు కూడా జరిగినట్లు తెలుస్తోంది. డైరెక్టర్ తేజ దర్శకత్వంలో నారా లోకేష్ హీరోగా నటించేందుకు ప్రయత్నాలు జరిగాయి. కానీ అవి కార్యరూపం దాల్చలేదు.