ఎన్టీఆర్ చిన్న కొడుకు మహా ముదురు.. హరికృష్ణ వద్దన్నారని ఆ పేరు మార్చేశారట, కళ్యాణ్ రామ్ కామెంట్స్

నందమూరి కళ్యాణ్ రామ్ నటించిన లేటెస్ట్ మూవీ డెవిల్. నవీన్ మేడారం దర్శకత్వంలో ఈ చిత్రం ప్రారంభమైనప్పటికీ వివాదాల కారణంగా ఆయన్ని తొలగించారు. నిర్మాత అభిషేక్ నామానే చివరికి దర్శకత్వ బాధ్యతలు నిర్వహించారు. డిసెంబర్ 29న భారీ అంచనాలతో విడుదలైన ఈ చిత్రం ఆశించిన స్థాయిలో రాణించలేదు. మంచి ప్రయత్నం అనే ప్రశంసలు మాత్రం దక్కాయి.  

ఈ చిత్ర ప్రచార కార్యక్రమాల్లో భాగంగా కళ్యాణ్ రామ్, డెవిల్ హీరోయిన్ సంయుక్త మీనన్ కలసి సుమ హోస్ట్ గా చేస్తున్న సుమ అడ్డా షోకి అతిథులుగా హాజరైన సంగతి తెలిసిందే.  షోలో కళ్యాణ్ రామ్ చేసిన సందడి అంతా ఇంతా కాదు. సుమకి ధీటుగా కామెడీ పంచ్ లు వేస్తూ ఆమెని ఆడేసుకున్నాడు.

అదే విధంగా కళ్యాణ్ రామ్ తన ఫ్యామిలీ విషయాలు, తండ్రి గురించి ఎమోషనల్ విషయాలు పంచుకున్నాడు. తన తొలి రెండు చిత్రాలు ఫ్లాప్ అయినప్పుడు తన తండ్రి ఇచ్చిన ప్రోత్సాహం మరువలేనిది అని కళ్యాణ్ రామ్ అన్నారు. హీరోగా రాణిస్తున్న సమయంలో నిర్మాతగా కూడా సినిమాలు నిర్మించాలనిపించింది. కొత్త బ్యానర్ స్టార్ట్ చేయాలనుకున్నా. ఈ విషయాన్ని నాన్నగారికి చెప్పా. 

ఆయన అడిగింది ఒక్కటే.. నటుడిగా, నిర్మాతగా బ్యాలెన్స్ చేసుకోగలవా అని అన్నారు. చేయగలను నాన్న అని చెప్పా. ఓకె నీకు ఏది అనిపిస్తే అది చెయ్. ఇక దేని గురించి ఆలోచించకు అని చెప్పారు. తన బ్యానర్ కి అమ్మ నాన్న పేరుపై హరి లక్ష్మి ప్రొడక్షన్స్ అని పెట్టాలనుకున్నా. 

నాన్నగారికి చెబితే వద్దు నాన్న అని అన్నారు. మనం ఈ రోజు ఈ స్థాయిలో ఉన్నామంటే అందుకు కారణం ఆ మహానుభావుడే ( సీనియర్ ఎన్టీఆర్). ఆయన పేరే పెట్టు అని సూచించారు. ఆ విధంగా ఎన్టీఆర్ ఆర్ట్స్ బ్యానర్ ని స్థాపించినట్లు కళ్యాణ్ రామ్ పేర్కొన్నారు. 

సుమ ఒక ఆసక్తికర ప్రశ్న అడిగింది. మీ పిల్లలు, తారక్ పిల్లలలో ఎవరు ఎక్కువగా అల్లరి చేస్తారు అని సుమ ప్రశ్నించింది. కళ్యాణ్ రామ్ ఏమాత్రం ఆలోచించకుండా తారక్ చిన్న కొడుకు భార్గవ్ రామ్ చాలా ఎక్కువ అల్లరి చేస్తాడని.. మహా ముదురు అన్నట్లుగా చెప్పుకొచ్చాడు. తన పిల్లలు కాస్త పెద్ద వాళ్ళు అయ్యారు కాబట్టి అల్లరి తగ్గిందని తెలిపాడు. ప్రస్తుతం కళ్యాణ్ రామ్ తారక్ తో దేవర చిత్రాన్ని నిర్మిస్తున్న సంగతి తెలిసిందే.