తాను చిరంజీవి అభిమానినని దర్శకుడు బాబీ చెప్పినప్పుడు బాలయ్య రియాక్షన్‌ ఏంటో తెలుసా? దర్శకుడిలో హిడెన్‌ టాలెంట్

దర్శకుడు బాబీ చిరంజీవి అభిమాని అని తెలిసినప్పుడు బాలకృష్ణ ఎలా రియాక్ట్ అయ్యాడు? తాజాగా ఆ విషయాలను బయటపెట్టాడు దర్శకుడు బాబీ. అంతేకాదు తనలోని హిడెన్‌ టాలెంట్‌ని కూడా చూపించారు.  

దర్శకుడు బాబీ బ్యాక్‌ టూ బ్యాక్‌ హిట్లతో దూసుకుపోతున్నారు. రెండేళ్ల క్రితం చిరంజీవితో `వాల్తేర్‌ వీరయ్య` సినిమా చేసి బ్లాక్‌ బస్టర్‌అందుకున్నారు. ఇప్పుడు బాలకృష్ణతో `డాకు మహారాజ్‌` సినిమా చేసి హిట్‌ కొట్టాడు. ఈ మూవీ సక్సెస్‌ ఈవెంట్‌ని అనంతరపురంలో నిర్వహించారు.

ఇందులో దర్శకుడు బాబీ తనలోని హిడెన్‌ టాలెంట్‌ని చూపించారు. ఈ సినిమాలోని `చిన్ని`పాటని విజిల్‌తో పాడి అందరిని ఆశ్చర్యపరిచారు. స్టేజ్‌పై బాబీ పాటకి ఏకంగా బాలయ్యనే ఫిదా అయిపోయి లేచి చప్పట్లు కొట్టడం విశేషం. 

ఇక అనంతరం దర్శకుడు బాబీ మాట్లాడుతూ, బాలకృష్ణ వ్యక్తిత్వం గురించి గొప్పగా చెప్పారు. తాను సినిమా చేస్తున్నప్పుడు తన గురించి అడిగారట బాలయ్య. ఏంటి? ఎలా వచ్చావ్‌ అనేది చర్చకు వచ్చింది.

దీంతో ఆ సమయంలో తాను మెగాస్టార్‌ చిరంజీవి అభిమానిగా ఇండస్ట్రీలోకి వచ్చాను, ఇలా సినిమాల్లో రాణించాలని ప్రయత్నించాను, కష్టాలు పడుతూ వచ్చానని చెప్పినప్పుడు బాలయ్య తనని చూసే విధానం చాలా మారిపోయిందని, తనపై గౌరవం పెరిగిందన్నారు బాబీ.  

తాను వేరే హీరో అభిమాని అంటే ఇతర హీరోలు అంతగా ఎంకరేజ్‌ చేయరు అని అంటుంటారు. కానీ బాలకృష్ణ ఎప్పుడూ అలా చూడలేదట. పైగా ఎంతగానో  ప్రేమతో ఎంకరేజ్‌ చేశారట. ఆయన అబద్దాలకు స్పేస్‌ ఇవ్వరు అని, ఫిల్టర్‌ లేకుండా ఉంటారని తెలిపారు.

అంతేకాదు `మా నాన్న కాలం చేయకు ముందే బాలకృష్ణతో సినిమా చేసి ఉంటే, మా నాన్నని ఇంకా బాగా అర్థం చేసుకోగలను` అని చెప్పాడు బాబీ. మా నాన్నగారు కూడా ఇలాగే ప్యూర్ హార్ట్ తో ఉంటారు. ప్రేమైనా కోపమైనా అప్పుడే చూపిస్తారని చెప్పారు. 

బాలయ్య గురించి బయట చెప్పడమే కానీ, ఎప్పుడూ దగ్గరగా చూసింది లేదు, కానీ ఈ సినిమా చేసేటప్పుడు చూశాను, ఆయనంటే ఏంటో అర్థమయ్యింది. ఎంతగా ప్రేమిస్తారో తెలిసింది. ఎంత స్వచ్ఛంగా ఉంటారో తెలిసిందన్నారు బాబీ. ఒకప్పుడు నాకు బాలకృష్ణ, ఎన్టీఆర్ లాంటి గొప్ప వ్యక్తి కొడుకుగా తెలుసు, కోట్ల మంది అభిమానులకు దేవుడని తెలుసు, మాట ఇస్తే నిలబడతారని తెలుసు.

కానీ దగ్గర నుంచి చూసాక బాలకృష్ణ గారిది ఎంత గొప్ప మనసో తెలిసింది. సినిమా విడుదలైన మొదటి రోజు నుంచే బాలకృష్ణ గారి అభిమానులు ఫోన్లు, మెసేజ్ లు చేసి మంచి సినిమా చేశారని మెచ్చుకున్నారని తెలిపారు. భవిష్యత్ లో బాలకృష్ణ గారితో `డాకు మహారాజ్` ని మించిన గొప్ప చిత్రం చేస్తానని మాట ఇస్తున్నా అని వెల్లడించారు దర్శకుడు బాబీ. 

బాలకృష్ణ హీరోగా ప్రగ్యా జైశ్వాల్‌, ఊర్వశీ రౌతేలా హీరోయిన్లుగా, శ్రద్ధా శ్రీనాథ్‌ కీలక పాత్రలో బాబీ డియోల్‌ నెగటివ్‌ రోల్‌ చేసిన `డాకు మహారాజ్‌` సంక్రాంతి కానుకగా జనవరి 12న విడుదలైన విషయం తెలిసిందే.

ఈ మూవీ విశేష ఆదరణతో రన్‌ అవుతుంది. బ్లాక్‌ బస్టర్‌ దిశగా వెళ్తుంది. ఈ నేపథ్యంలో బుధవారం అనంతపురంలో సక్సెస్‌ సెలబ్రేషన్‌ నిర్వహించారు. ఈ మూవీ ఈ శుక్రవారం నుంచి హిందీలో కూడా డబ్‌ చేసి విడుదల చేస్తున్నారు.