మీ అందరికీ నా ప్రేమ అంటూ ముద్దు ముద్దుగా.. హైదరాబాద్ ని అందంతో ముంచెత్తిన ఐశ్వర్యారాయ్

తమిళ లెజెండ్రీ డైరెక్టర్ మణిరత్నం తెరకెక్కించిన పొన్నియిన్ సెల్వన్ 1 గత ఏడాది విడుదలై మంచి రెస్పాన్స్ దక్కించుకుంది. పొన్నియిన్ సెల్వన్ నవల ఆధారంగా మణిరత్నం ఈ చిత్రాన్ని రెండు భాగాలుగా తెరకెక్కించారు. మణిరత్నం కలల ప్రాజెక్ట్ ఇది. 

ఏప్రిల్ 28న రెండవ భాగం మరింత భారీ అంచనాలతో ప్రేక్షకుల ముందుకు రానుంది. దీనితో ప్రచార కార్యక్రమాలు జోరుగా సాగుతున్నాయి. మునుపెన్నడూ చూడని విధంగా ఈ చిత్రంలో స్టార్ కాస్టింగ్ నటిస్తున్న సంగతి తెలిసిందే.

ఐశ్వర్యారాయ్, విక్రమ్, కార్తీ, జయం రవి , శోభిత ధూళిపాళ, త్రిష ఇలా ప్రముఖ నటులు ఈ చిత్రంలో నటిస్తున్నారు. రెండవ భాగంలో ఐశ్వర్యారాయ్ పాత్రపై అందరిలో ఉత్కంఠ నెలకొని ఉంది. ఎందుకంటే మొదటి భాగంలో ఐశ్వర్యరాయ్ ని ఒక వృద్ధురాలి గెటప్ లో చూపించి ముగించారు. 

ఏప్రిల్ 28న ఈ పీఎస్2 రిలీజ్ అవుతుండడంతో చిత్ర యూనిట్ ఇండియా మొత్తం తిరుగుతూ ప్రచార కార్యక్రమాలు నిర్వహిస్తున్నారు. నేడు హైదరాబాద్ లో పీఎస్ 2 ప్రీరిలీజ్ ఈవెంట్ జరిగింది. ప్రీ రిలీజ్ ఈవెంట్ కి మణిరత్నం, కార్తీ, జయం రవి, విక్రమ్, శోభిత, త్రిష అలాగే ప్రపంచ సుందరి ఐశ్వర్యారాయ్ హాజరయ్యారు. 

ప్రీరిలీజ్ వేడుకలో ఐశ్వర్య తన అందంతో యువతని మంత్రముగ్ధుల్ని చేసింది. ఆమె వేదికపై మాట్లాడుతుంటే ఆడియన్స్ అంతా కేరింతలు కొట్టారు. ఐశ్వర్య వేదికపైకి రాగానే యాంకర్ సుమ చేసిన హడావిడి అంతా ఇంతా కాదు. ఐశ్వర్య చాలా దగ్గరగా చూసేసాను అని సంబరపడిపోతుండగా.. ఐశ్వర్య వచ్చి ఆమెకి హగ్ ఇచ్చింది. 

ఇక ఐశ్వర్యరాయ్.. బావున్నారా.. మీ అందరికి నా ప్రేమ అంటూ తెలుగులో ముద్దు ముద్దుగా కొన్ని మాటలు మాట్లాడింది. అనంతరం పొన్నియిన్ సెల్వన్ చిత్రం గురించి మాట్లాడుతూ మణిరత్నం తన గురువు అంటూ ప్రశంసించింది. చిత్రంలో నటించిన అందరి గురించి మాట్లాడింది. ఐశ్వర్యారాయ్ ప్రీరిలీజ్ ఈవెంట్ లో మెరిసిన ఫోటోలు ప్రస్తుతం సోషల్ మీడియాలో వైరల్ గా మారాయి.