ఆ కుట్రలు ఇప్పుడు నాపై లేవు.. `99సాంగ్స్ `ఈవెంట్‌లో రెహ్మాన్‌.. షూస్‌ వైరల్‌

First Published Mar 25, 2021, 10:01 PM IST

ఆస్కార్‌ విన్నింగ్‌ మ్యూజిక్‌ డైరెక్టర్‌ ఏ.ఆర్‌ రెహ్మాన్‌ రైటర్‌గా, నిర్మాతగా మారి రూపొందించిన చిత్రం `99సాంగ్స్`. ఈ చిత్ర ప్రెస్‌మీట్‌ గురువారం హైదరాబాద్‌లో జరిగింది. ఇందులో రెహ్మాన్‌ వేసుకున్న షూస్‌ హైలైట్‌గా మారాయి. కింద గ్లాస్‌ తరహాలో ఉండి, టాప్‌ బ్లాక్‌ షూస్‌ మాదిరిగా ఉన్న ఈ షూస్‌ అందరి దృష్టిని ఆకర్షిస్తున్నాయి.

ఆస్కార్‌ విన్నర్‌,లెజెండరీ మ్యూజిక్‌ డైరెక్టర్‌ ఏ ఆర్‌ రెహ్మాన్‌ నిర్మించిన `99సాంగ్స్` చిత్రానికి విశ్వేష్‌ కృష్ణమూర్తి దర్శకత్వం వహించారు. ప్రముఖ నిర్మాణ సంస్థ జియో స్టుడియోస్‌తో కలిసి `99 సాంగ్స్` అనే చిత్రాన్ని నిర్మించారు ఏహార్ రెహ్మాన్. ఈ సినిమాకు నిర్మాతగానూ, రచయితగానూ పనిచేశారు.

ఈ చిత్రం ద్వారా ఇహాన్‌, ఇడిల్సి వ‌ర్గాస్‌ల‌ను హీరో హీరోయిన్లుగా ప‌రిచ‌యం కాబోతున్నారు. ఈ చిత్రాన్ని తెలుగు, త‌మిళ‌, హిందీ భాష‌ల్లో ఏప్రిల్ 16 న విడుద‌ల చేస్తున్నారు.

ఈ సందర్భంగా హైదరాబాద్‌లో ఆడియో వేడుకను నిర్వహించారు. ఈ ఆడియో వేడుకలో ఏఆర్ రెహ్మాన్ ధరించిన షూ హాట్ టాపిక్‌గా మారింది. ఆ షూ దాదాపు రెండు అడుగుల ఎత్తు ఉంది. ఈ షూ చాలా స్పెషల్ అంటూ నెటిజన్లు వైరల్ చేస్తున్నారు. ఈ షూస్‌ ప్రత్యేకత ఏంటీ? దీని కాస్ట్ ఎంతా అని వెతికే పనిలో బిజీ అయ్యారు.

ఈ ఈవెంట్‌లో రెహ్మాన్‌ మాట్లాడుతూ, మ్యూజిక్ డైరెక్టర్‌గా ప్రయాణం సాగుతున్న సమయంలో రచయితగా మారమనే ఆలోచనను ప్రముఖ మ్యూజిక్ కంపోజర్ మార్క్ వెబ్ నా మదిలో నాటాడు. అప్పటి నుంచి నేను మ్యూజిక్‌తోపాటు కథల గురించి ఆలోచించడం మొదలుపెట్టాను. ఆ తర్వాత చాలా కథలు నా సహచరులతో పంచుకొన్నాను. ఆ క్రమంలోనే 99 సాంగ్స్ కథ పుట్టింది.

ఆస్కార్ అవార్డు గెలుచుకొన్న తర్వాత అకాడమీలో సభ్యుడిగా చేరాను. అప్పటి నుంచి అకాడమీలో జరిగే స్క్రీన్ ప్లే, స్టోరీ రైటింగ్, ఇతర అంశాలకు చెందిన వర్క్‌షాప్‌లకు హాజరయ్యాను. దాంతో నాకు సినిమా మేకింగ్‌లో అన్ని విభాగాల మీద పట్టు పెరిగింది. సినిమా నిర్మాణం వైపు ఆసక్తి పెరిగింది. అందుకే నిర్మాతగా మారానని చెప్పారు రెహ్మాన్‌.

బాలీవుడ్‌లో కొందరు గ్యాంగ్‌గా తనకు వ్యతిరేకంగా పనిచేశారు. అందుకే బాలీవుడ్ చిత్రాలకు దూరమయ్యానని కొద్ది నెలల క్రితం ఓ ఇంటర్యూలో చెప్పారు.

బాలీవుడ్‌లో అాలాంటి కుట్రలు, గ్యాంగులు ఇంకా కొనసాగుతున్నాయా? అని అడిగిన ప్రశ్నకు సమాధానం ఇస్తూ.. ప్రస్తుతం అలాంటి పరిస్థితులు లేవు. అలాంటి గ్యాంగులు కనమరుగు అయ్యాయి. ఇప్పుడు బాలీవుడ్‌లో సానుకూలమైన పరిస్థితులు నెలకొన్నాయని చెప్పారు రెహ్మాన్‌.