పంత్, పాండ్యా సిక్సర్ల మోత... కెఎల్ రాహుల్ సూపర్ సెంచరీ... రెండో వన్డేలో

ఇంగ్లాండ్‌తో జరుగుతున్న రెండో వన్డేలో టాస్ ఓడి, తొలుత బ్యాటింగ్ చేసిన టీమిండియా నిర్ణీత 50 ఓవర్లలో 6 వికెట్లు కోల్పోయి 336 పరుగులు చేసింది. ఓపెనర్లు విఫలమైనా మిడిల్ ఆర్డర్ బ్యాట్స్‌మెన్ అద్భుతంగా రాణించి, జట్టుకి మంచి స్కోరు అందించారు...

గత మ్యాచ్‌లో 98 పరుగులు చేసిన శిఖర్ ధావన్, 4 పరుగులకే పెవిలియన్ చేరాడు. 17 బంతులాడిన ధావన్, తోప్లే బౌలింగ్‌లో బెన్ స్టోక్‌కి క్యాచ్ ఇచ్చి అవుట్ అయ్యాడు. 9 పరుగుల వద్ద తొలి వికెట్ కోల్పోయింది టీమిండియా...

25 బంతుల్లో 5 ఫోర్లతో 25 పరుగులు బాదిన రోహిత్ శర్మను సామ్ కుర్రాన్ అవుట్ చేశాడు. కుర్రాన్ బౌలింగ్‌లో అదిల్ రషీద్‌కి క్యాచ్ ఇచ్చి అవుట్ అయ్యాడు రోహిత్...

37 పరుగులకే రెండు వికెట్లు కోల్పోయిన టీమిండియాను కెప్టెన్ విరాట్ కోహ్లీ, కెఎల్ రాహుల్ కలిసి ఆదుకున్నారు. ఈ ఇద్దరూ కలిసి మూడో వికెట్‌కి 121 పరుగులు జోడించారు...

79 బంతుల్లో 3 ఫోర్లు, ఓ సిక్సర్‌తో 66 పరుగులు చేసిన భారత కెప్టెన్ విరాట్ కోహ్లీ... అదిల్ రషీద్ బౌలింగ్‌లో జోస్ బట్లర్‌కి క్యాచ్ ఇచ్చి అవుట్ అయ్యాడు...

వన్‌డౌన్ బ్యాట్స్‌మెన్‌గా పది వేల పరుగులు పూర్తి చేసిన రెండో బ్యాట్స్‌మెన్‌గా రికార్డు క్రియేట్ చేశాడు విరాట్ కోహ్లీ. ఇంతకుముందు ఆసీస్ మాజీ కెప్టెన్ రికీ పాంటింగ్ మాత్రమే ఈ ఫీట్ సాధించాడు...

టూ డౌన్‌లో వచ్చిన రిషబ్ పంత్, వస్తూనే బౌండరీల మోత మోగించాడు. అంపైర్ తప్పుడు నిర్ణయాల వల్ల రెండు సార్లు అవుట్ అయ్యే ప్రమాదాన్ని తప్పించుకున్న రిషబ్ పంత్ 28 బంతుల్లో హాఫ్ సెంచరీ అందుకున్నాడు...

114 బంతుల్లో 7 ఫోర్లు, 2 సిక్సర్లతో 108 పరుగులు చేసిన కెఎల్ రాహుల్, వన్డేల్లో ఐదో సెంచరీ నమోదుచేశాడు. టీమిండియా తరుపున వన్డేల్లో ఆఖరి సెంచరీ బాదిన బ్యాట్స్‌మెన్ కూడా రాహుల్ కావడం విశేషం...

కెఎల్ రాహుల్, రిషబ్ పంత్ కలిసి నాలుగో వికెట్‌కి 113 పరుగుల భాగస్వామ్యం నమోదుచేశారు. సెంచరీ పూర్తిచేసిన తర్వాత టామ్ కుర్రాన్ బౌలింగ్‌లో తోప్లేకి క్యాచ్ ఇచ్చి అవుట్ అయ్యాడు కెఎల్ రాహుల్..

40 బంతుల్లో 3 ఫోర్లు, 7 సిక్సర్లతో 77 పరుగులు చేసిన రిషబ్ పంత్ కూడా టామ్ కుర్రాన్ బౌలింగ్‌లోనే జాసన్ రాయ్‌కి క్యాచ్ ఇచ్చి అవుట్ అయ్యాడు...
 

గత మ్యాచ్‌లో 1 పరుగుకే అవుటైన హార్ధిక్ పాండ్యా... సిక్సర్లతో విరుచుకుపడ్డాడు. తాను ఎదుర్కొన్న తొలి మూడు బంతుల్లో రెండు సిక్సర్లు బాదాడు హార్ధిక్ పాండ్యా...

16 బంతుల్లో ఓ ఫోర్, నాలుగు సిక్సర్లతో 35 పరుగులు చేసిన హార్ధిక్ పాండ్యా, తోప్లే బౌలింగ్‌లో జాసన్ రాయ్‌కి క్యాచ్ ఇచ్చి అవుట్ అయ్యాడు. 

ఆఖరి 10 ఓవర్లలో 126 పరుగులు రాగా, ఆఖరి 5 ఓవర్లలో 63 పరుగులు రాబట్టింది టీమిండియా...

ఇంగ్లాండ్ బౌలర్లలో తోప్లే 2, టామ్ కుర్రాన్ రెండు వికెట్లు తీయగా అదిల్ రషీద్, సామ్ కుర్రాన్ తలా ఓ వికెట్ తీశారు.