భార్య ముఖం చూపించని భారత క్రికెటర్ ఇర్ఫాన్ పఠాన్... సఫా బేగ్ గురించి తెలిస్తే...

First Published May 26, 2021, 3:55 PM IST

భారత మాజీ క్రికెటర్, ఆల్‌రౌండర్ ఇర్ఫాన్ పఠాన్ బౌలింగ్ యాక్షన్‌కి చాలామంది ఫ్యాన్స్ ఉన్నారు. మొదటి ఓవర్‌లోనే వికెట్లు తీయడం ఇర్ఫాన్ పఠాన్ ప్రత్యేకత. చాలా ఏళ్లు జట్టులో చోటు కోసం ఎదురుచూసిన ఇర్ఫాన్ పఠాన్, రెండేళ్ల కిందట అంతర్జాతీయ క్రికెట్‌కి రిటైర్మెంట్ ప్రకటించేశాడు.

అప్పుడప్పుడూ సోషల్ మీడియాలో తన వ్యక్తిగత ఫోటోలు పోస్టు చేసే ఇర్ఫాన్ పఠాన్, భార్య ముఖాన్ని మాత్రం చూపించడం లేదు.

తాజాగా కొడుకును ఎత్తుకుని, భార్య పక్కనే నిల్చొని ఉన్న రోడ్ సేఫ్టీ వరల్డ్ సిరీస్‌నాటి ఫోటోను పోస్టు చేసిన ఇర్ఫాన్ పఠాన్, ఆ ఫోటోలో సఫా బేగ్ ముఖాన్ని మాత్రం కనిపించకుండా బ్లర్ చేశాడు. ఇదే కదా ఇంతకుముందు ఇర్ఫాన్ పఠాన్ పోస్టు చేసిన చాలా ఫోటోల్లో ఆమె ముఖం కనిపించదు.

‘నా భార్యకు ముఖాన్ని చూపించడం ఇష్టం లేదు. నా అకౌంట్ నుంచి పోస్టు చేసే ఫోటోల్లో చాలావరకూ ఆమెనే పోస్టు చేస్తుంది. తను ముఖం చూపించాలని ఉంటే చూపిస్తుంది లేదంటే లేదు. నేను ఆమెకి భర్తని మాత్రమే, మాస్టర్‌ను కాదు’ అంటూ సమాధానం ఇచ్చాడు ఇర్ఫాన్ పఠాన్.

సౌదీ అరేబియాకు చెందిన సఫా బేగ్, పెళ్లికి ముందు అక్కడ మోడల్‌గా మంచి గుర్తింపు తెచ్చుకుంది. అయితే సౌదీ సంప్రదాయం ప్రకారం అక్కడి మహిళలు పెళ్లైన తర్వాత పరాయి వ్యక్తులకు ముఖం చూపించకూడదు.

అదీకాకుండా పెళ్లైన కొత్తలో ఇర్ఫాన్ పఠాన్ పోస్టు చేసిన భార్య ఫోటోపై సోషల్ మీడియాలో తీవ్ర వ్యతిరేకత వచ్చింది. చాలామంది మత ఛాందసవాదులు, భార్య ఫోటోను ఇలా పోస్టు చేస్తావా? మన సంప్రదాయం గురించి తెలీదా? అంటూ కామెంట్లు చేశారు.

ఈ సంఘటనతో బాగా అప్‌సెట్ అయిన సఫా బేగ్, సోషల్ మీడియాకు దూరంగా ఉండాలని నిర్ణయించుకుంది. అప్పుడప్పుడు తన భర్తకు సంబంధించిన విషయాలు, ఫోటోలు పోస్టు చేసిన తన ముఖం కనిపించకుండా జాగ్రత్త పడుతోంది.