Stock Market Crashes రక్తమోడిన మార్కెట్లు.. చరిత్రలో ఇవే అతిపెద్ద క్రాష్ లు!!

భారత స్టాక్ మార్కెట్లు ఏప్రిల్ 7న ఇన్వెస్టర్లకు కన్నీరు తెప్పించాయి. ఆ ఒక్కరోజులోనే పెట్టుబడిదారుల సంపద రూ.16 లక్షల కోట్లు ఆవిరైపోయింది. ఇలాంటి పెద్ద పతనాలు గతంలోనూ ఉన్నాయి. ఇన్వెస్టర్లను భయకంపితులను చేసిన అలాంటి క్రాష్ ల గురించి ఓసారి చర్చిద్దాం.

కుప్పకూలిన సెన్సెక్స్, నిఫ్టీ

ట్రంప్ టారిఫ్ ల దాడి, ప్రతిగా చైనా మేమూ అంతకుమించి సుంకాలు విధిస్తామని ప్రకటించడంతో ఇది ఎక్కడ ట్రేడ్ వార్ కు దారి తీస్తుందోనని అంతటా భయాలు మొదలయ్యాయి. దాంతో ప్రపంచ మార్కెట్లతోపాటు భారత స్టాక్ మార్కెట్లు సోమవారం రక్తసిక్తమయ్యాయి. గ్లోబల్ ట్రేడ్ టెన్షన్స్ కారణంగా అమెరికాలో మాంద్యం వస్తుందనే భయంతో సెన్సెక్స్, నిఫ్టీ 50 సూచీలు భారీగా పతనమయ్యాయి. ప్రారంభమైన కొద్ది నిమిషాల్లోనే పెట్టుబడిదారుల సంపద దాదాపు రూ.16 లక్షల కోట్లు ఆవిరైపోయింది.

బీఎస్ఈ సెన్సెక్స్ 3,914.75 పాయింట్లు లేదా 5.19% పతనమై 71,449.94 వద్ద ప్రారంభమైంది. ఎన్ఎస్ఈ నిఫ్టీ 50 1,146.05 పాయింట్లు లేదా 5.00% తగ్గి 21,758.40 వద్ద ప్రారంభమైంది. ఇది ఒక సంవత్సరం కనిష్టానికి చేరుకుంది. మిడ్‌క్యాప్, స్మాల్‌క్యాప్ సూచీలు 10% వరకు పడిపోయాయి.

ప్రపంచ వాణిజ్య యుద్ధ భయాలు

అమెరికా అధ్యక్షుడు డొనాల్డ్ ట్రంప్ ప్రతీకార చర్యల కారణంగా అమెరికాలో మాంద్యం వస్తుందనే భయంతో మార్కెట్ ఒక్కసారిగా కుప్పకూలింది. దీనివల్ల పూర్తిస్థాయి ప్రపంచ వాణిజ్య యుద్ధం వస్తుందనే ఆందోళనలు మొదలయ్యాయి. ఇండియా వీఐఎక్స్ 56.50% పెరిగి 21.53కి చేరుకుంది.

భారీ అమ్మకాల కారణంగా బీఎస్ఈ లిస్టెడ్ కంపెనీల మార్కెట్ క్యాపిటలైజేషన్ రూ.403 లక్షల కోట్ల నుంచి రూ.387 లక్షల కోట్లకు పడిపోయింది. పెట్టుబడిదారుల సంపద దాదాపు రూ.16 లక్షల కోట్లు ఆవిరైపోయింది. 1987 అక్టోబర్ 19న జరిగిన 'బ్లాక్ మండే' క్రాష్‌ను గుర్తుకు తెచ్చేలా సోమవారం మార్కెట్ పతనం జరిగింది.

భారతదేశంలో అతిపెద్ద సింగిల్-డే స్టాక్ మార్కెట్ క్రాష్‌లు ఇవి

1. హర్షద్ మెహతా స్కామ్ క్రాష్ (1992)

ఏప్రిల్ 28, 1992న హర్షద్ మెహతా స్టాక్ బ్రోకర్ స్కామ్ వెలుగులోకి రావడంతో సెన్సెక్స్ 570 పాయింట్లు లేదా 12.7% పడిపోయింది. ఈ సంఘటన పెట్టుబడిదారుల నమ్మకాన్ని దెబ్బతీసింది. తర్వాత మార్కెట్ కోలుకోవడానికి చాలాకాలం పట్టింది.

2. కేతన్ పరేఖ్ స్కామ్ క్రాష్ (2001)

కేతన్ పరేఖ్ బ్రోకర్ స్కామ్ మార్చి 2001లో బయటపడటంతో సెన్సెక్స్ 176 పాయింట్లు లేదా 4.13% పడిపోయింది. డాట్-కామ్ బస్ట్, గుజరాత్ భూకంపం వంటి ప్రతికూల సంఘటనలు మరింత నష్టాన్ని కలిగించాయి.

3. ఎన్నికల షాక్ క్రాష్ (2004)

మే 17, 2004న ఊహించని ఎన్నికల ఫలితాల తర్వాత యూపీఏ ప్రభుత్వం ఆర్థిక సంస్కరణలకు కట్టుబడి ఉండకపోవచ్చనే భయంతో సెన్సెక్స్ 11.1% పడిపోయింది.

4. గ్లోబల్ ఫైనాన్షియల్ క్రైసిస్ క్రాష్ (2008)

ప్రపంచ ఆర్థిక సంక్షోభం మధ్య సెన్సెక్స్ జనవరి 21, 2008న 1,408 పాయింట్లు లేదా 7.4% పడిపోయింది. యూఎస్ ఇన్వెస్ట్‌మెంట్ బ్యాంక్ లెహ్మాన్ బ్రదర్స్ పతనంతో ఎఫ్‌ఐఐ నిధులు భారీగా తరలిపోయాయి.

5. కోవిడ్-19 పాండమిక్ క్రాష్ (2020)

మార్చి 23, 2020న దేశవ్యాప్త లాక్‌డౌన్ ప్రకటించిన తర్వాత సెన్సెక్స్ 3,935 పాయింట్లు లేదా 13.2% పడిపోయింది. ప్రపంచ ఆరోగ్య సంక్షోభం తీవ్ర మాంద్యం భయాలను రేకెత్తించింది.

ముందు ఏముంది?

ప్రపంచ పరిస్థితులు మార్కెట్ సెంటిమెంట్‌ను ప్రభావితం చేస్తాయని విశ్లేషకులు భావిస్తున్నారు. అమెరికాలో మాంద్యం వస్తుందనే భయంతో ఈ కరెక్షన్ వచ్చింది. పెట్టుబడిదారులు జాగ్రత్తగా ఉండాలి అని  విశ్లేషకులు అంటున్నారు. ఈ నేపథ్యంలో పెట్టుబడిదారులు ఆచితూచి పెట్టుబడి పెట్టాల్సిన అవసరం ఏర్పడింది.