సూపర్ స్టార్ మహేష్ బాబు రీమేక్ సినిమాలకు వ్యతిరేకం కానీ ఓ రీమేక్ సినిమాకు ఓకే చెప్పిన మహేష్ బాబు మురుగదాస్ మూవీ కత్తి సినిమా రీమేక్ చేద్దామనుకున్న ప్రిన్స్
తెలుగు ఫిల్మ్ ఇండస్ట్రీకి చెందిన స్టార్ హీరోల్లో సూపర్ స్టార్ మహేష్ బాబు స్టైల్ వేరు. మహేష్ బాబుకు రీమేక్ సినిమాలంటే అస్సలు పడదు. అందుకే ఇప్పటిదాకా డైరెక్ట్ మూవీస్ తప్ప రీమేక్ లు చేయలేదు. ఆయన రీమేక్ సినిమాలు చేయడానికి పూర్తి వ్యతిరేకం. ఈ విషయంలో మహేష్ చాలాసార్లు క్లారిటీ కూడా ఇచ్చాడు. ఐతే గతంలో ఒక్క సినిమా విషయంలో మాత్రం మహేష్ తన పాలసీని పక్కనబెట్టాడట.
మహేష్ బాబు గతంలో ఓ రీమేక్ సినిమా చేయడానికి రెడీ అయ్యాడట. ఆ సినిమా మరేదో కాదు తెలుగులో మెగా స్టార్ రీ ఎంట్రీ ఇచ్చిన ఖైదీనెంబర్ 150 తమిళ సినిమా కత్తి. మురుగదాస్ దర్శకత్వంలో విజయ్ హీరోగా నటించిన సినిమా ఇది. దీన్నే చిరంజీవి ‘ఖైదీ నెంబర్ 150’గా రీమేక్ చేసిన సంగతి తెలిసిందే. ఈ రీమేక్ ముందు తన దగ్గరికే వచ్చిందని ఓ తమిళ మ్యాగజైన్కు ఇచ్చిన ఇంటర్వ్యూలో మహేష్ వెల్లడించాడు.
‘‘నిజానికి నాకు మొదటి నుంచి రీమేక్లపై ఆసక్తి లేదు. ఒక సినిమాని చూసి అదే కథలో నటించాలంటే ఉత్సాహం ఉండదు. షూటింగ్కి వెళ్లాలంటే ఏదైనా కొత్తగా అనిపించాలి. నా దగ్గరికి రెండు మూడు రీమేక్ ప్రపోజల్స్ వచ్చాయి. ‘కత్తి’ సినిమా కథ ముందు నా దగ్గరకే వచ్చింది. ఇది డైరెక్టర్ మూవీ. ఆ కథను వేరే దర్శకుడు చేయాలంటే గట్స్ ఉండాలి. అందుకే మురుగదాస్ దర్శకత్వం వహిస్తే చేస్తానని చెప్పాను. అప్పుడు ఆయన హిందీలో బిజీగా ఉన్నారు. దాంతో కుదరలేదు. ఇక మిగతా రీమేక్ల విషయంలో అసలేమాత్రం ఆసక్తి చూపించలేదు. బేసిగ్గా నేను రీమేక్లకు వ్యతిరేకినని’’ మహేష్ బాబు చెప్పుకొచ్చాడు.
ఇక మురుగదాస్ దర్శకత్వంలో నటిస్తున్న ‘స్పైడర్’ గురించి మహేష్ చెబుతూ.. ‘‘‘శ్రీమంతుడులో నటిస్తున్నప్పుడు మురుగదాస్ వచ్చి గంటన్నర పాటు కథ చెప్పారు. విన్న వెంటనే ఓకే చెప్పేశాను. ఆ రోజు ఆయన ఏం చెప్పారో.. అలాగే ప్రెజెంట్ చేయబోతున్నారు. అలాంటి సత్తా చాలా తక్కువ మంది దర్శకులకు మాత్రమే ఉంటుంది. ఆయన తీసిన ‘రమణ’, ‘కత్తి’ సినిమాలు ఒక ఎత్తు. ‘గజిని’, ‘తుపాకి’ మరో ఎత్తు. ఈ సినిమా గజినీ, తుపాకీ లాంటి సినిమాల కోవకి చెందినది. తప్పకుండా అందరికీ నచ్చుతుంది’’ అన్నాడు సూపర్ స్టార్ మహేష్ బాబు.
