`ఓజీ` డేట్కి దుల్కర్ సల్మాన్ `లక్కీ భాస్కర్`.. పవన్ కళ్యాణ్ రావడం లేదా?
దుల్కర్ సల్మాన్ హీరోగా నటిస్తున్న `లక్కీ భాస్కర్` మూవీ రిలీజ్ డేట్ని ఇచ్చారు. దీంతో ఇప్పుడు పవన్ కళ్యాణ్ మూవీ రావడం లేదా అనే అనుమానాలు కలుగుతున్నాయి.
`మహానటి`తో తెలుగు ఆడియెన్స్ కి దగ్గరయ్యాడు మలయాళ స్టార్ దుల్కర్ సల్మాన్. `సీతారామం` చిత్రంతో తెలుగు హీరో అయిపోయాడు. ఇప్పుడు వరుసగా తెలుగులోనే సినిమాలు చేస్తున్నాడు. ప్రస్తుతం ఆయన `లక్కీ భాస్కర్` మూవీలో హీరోగా నటిస్తున్నాడు. వెంకీ అట్లూరీ దర్శకత్వంలో ఈ మూవీ రూపొందుతుంది. సితార ఎంటర్టైన్మెంట్స్, ఫార్చ్యూన్ ఫోర్ సినిమాస్ పతాకాలపై నాగవంశీ, సాయి సౌజన్య నిర్మిస్తున్నారు. తాజాగా ఈ మూవీ రిలీజ్ డేట్ని ప్రకటించారు. `లక్కీ భాస్కర్`ని సెప్టెంబర్ 27న విడుదల చేస్తున్నట్టు ప్రకటించారు.
ఇక్కడే పెద్ద ట్విస్ట్ ఉంది. సెప్టెంబర్ 27నే పవర్ స్టార్ పవన్ కళ్యాణ్ నటించిన `ఓజీ` సినిమా కూడా రాబోతుంది. చాలా రోజుల క్రితమే ఈ విషయాన్ని వెల్లడించింది యూనిట్. కొంత పార్ట్ షూటింగ్ చేయాల్సి ఉంది. పవన్ రాజకీయంగా ఫ్రీ అయిన తర్వాత ఈ మూవీ షూటింగ్లో పాల్గొంటాడు. త్వరగా షూటింగ్ పూర్తి చేసి సెప్టెంబర్ 27న రిలీజ్ చేయాలని భావిస్తున్నారు. కానీ ఇంతలోనే `ఓజీ` డేట్కి దుల్కర్సల్మాన్ `లక్కీ భాస్కర్` రాబోతుండటం విశేషం.
ఇదిప్పుడు `ఓజీ` రిలీజ్ ని సస్పెన్స్ లో పడేసింది. ఇంతకి `ఓజీ` వస్తుందా? వాయిదా పడుతుందా అనే అనుమానాలు రేకెత్తిస్తుంది. ఓ పెద్ద సినిమాకి పోటీగా అంటే ఎవరూ సాహసం చేయరు. దుల్కర్ లాంటి హీరో సాహసం చేస్తున్నారంటే అది ఆ డేట్ కి రావడం లేదనే అర్థం. మరి ఇందులో నిజమెంతా అనేది తెలియాల్సి ఉంది. కానీ ఈ వార్త ఇప్పుడు పవన్ ఫ్యాన్స్ ని కలవరానికి గురి చేస్తుంది. పవన్ వస్తాడా రాడా అనేది మరింత ఆందోళన కలిగిస్తుంది.
వెంకీ అట్లూరీ దర్శకత్వంలో దుల్కర్ సల్మాన్ హీరోగా నటిస్తున్న ఈ చిత్రంలో మీనాక్షి చౌదరి హీరోయిన్గా నటిస్తుంది. ప్రముఖ స్వరకర్త జి.వి. ప్రకాష్ కుమార్ ఈ చిత్రానికి సంగీతం అందిస్తుండగా, ప్రముఖ సినిమాటోగ్రాఫర్ నిమిష్ రవి మెస్మరైజింగ్ విజువల్స్ అందిస్తున్నారు. ఈ చిత్రానికి నేషనల్ అవార్డ్ విన్నింగ్ ప్రొడక్షన్ డిజైనర్ బంగ్లాన్, ఎడిటర్ నవీన్ నూలి పనిచేస్తున్నారు. 1980- 1990 పీరియాడిక్ బ్యాక్ డ్రాప్ లో ఈ చిత్రం తెరకెక్కుతోంది. నాటి బొంబాయి(ముంబై) నేపథ్యంలో ఈ సినిమా తెరకెక్కుతోందని మేకర్స్ తెలిపారు.
సాధారణ బ్యాంకు క్యాషియర్ లక్కీ భాస్కర్ ఆసక్తికరమైన, అసాధారణమైన జీవిత ప్రయాణాన్ని వివరిస్తుంది. దుల్కర్ సల్మాన్ పుట్టినరోజు సందర్భంగా ఇటీవల విడుదలైన టీజర్ ఈ సినిమాపై భారీ అంచనాలను నెలకొల్పింది. ఇక ఈ చిత్రం షూటింగ్ చివరి దశకు చేరుకుంది. ఈ చిత్రాన్ని తెలుగు, మలయాళం, హిందీ మరియు తమిళ భాషలలో ప్రపంచవ్యాప్తంగా భారీస్థాయిలో థియేటర్లలో విడుదల చేయనున్నారు. విభిన్న కథతో ప్రేక్షకులకు కొత్త అనుభూతిని అందించడానికి దుల్కర్ సల్మాన్, వెంకీ అట్లూరి శ్రమిస్తున్నారు. మరి హిట్ పడుతుందా అనేది చూడాలి.