కమర్షియల్ చిత్రాలను  కళాత్మకంగా తీయగలడన్న పేరు  తెచ్చుకున్న దర్శకుడు గుణశేఖర్. గతంలో ఆయన  రూపొందించిన అనేక చిత్రాలు ప్రేక్షకులను ఎంతగానో ఆకట్టుకున్నాయి.  ఒక్కడు వంటి సూపర్ హిట్స్ ఆయన నుంచి వచ్చాయి. అలాగే ఆ మధ్యన  అనుష్క ప్రధాన పాత్రలో 'రుద్రమదేవి' చారిత్రాత్మక కథా చిత్రాన్ని భారీ స్థాయిలో రూపొందించారు.

ఈ క్రమంలో తన తదుపరి చిత్రంగా రానా దగ్గుబాటి టైటిల్ పాత్రధారిగా 'హిరణ్యకశ్యప' పేరిట పౌరాణిక చిత్రాన్ని తెరకెక్కించటానికి సన్నాహాలు చేసారు. అయితే, ప్రస్తుతానికి ఆ 'హిరణ్యకశ్యప'ను పక్కనపెట్టి 'శాకుంతలం' పేరిట ఆయన ఓ ప్రేమకావ్యాన్ని రూపొందించడానికి రంగంలోకి దిగారు. దీనికి సంబంధించిన టైటిల్ ని, మోషన్ పోస్టర్ని  ఆయన విడుదల చేశారు.

https://youtu.be/h9uq0er6rZY

"వెండితెరపై 'హిరణ్య కశ్యప'లో నరసింహావతారాన్ని సాక్షాత్కరింపజేసే ముందు.. భారతాన ఆదిపర్వంలోని ఆహ్లాదకర ప్రేమకథని ఆవిష్కరిస్తూ.." అని పేర్కొంటూ,  గుణశేఖర్ ఈ మోషన్ పోస్టర్ ని రిలీజ్ చేశారు. బ్లాక్ అండ్ వైట్ లో శకుంతల పోట్రైట్ తో ఈ మోషన్ పోస్టర్ రమణీయంగా వుంది. దీనికి ప్రముఖ సంగీత దర్శకుడు మణిశర్మ సంగీతాన్ని అందిస్తున్నారు. నటీనటుల వివరాలు త్వరలో ప్రకటిస్తారు.