అల్లు అర్జున్ ప్రస్తుతం త్రివిక్రమ్ శ్రీనివాస్ దర్శత్వంలో అల వైకుంఠపురములో చిత్రంలో నటిస్తున్నాడు. ఫ్యామిలీ ఎంటర్టైనర్ గా  తెరకెక్కుతున్న ఈ చిత్రం సంక్రాంతికి రిలీజ్ కానుంది. ఇదిలా ఉండగా యువ హీరో శ్రీవిష్ణు ఇటీవల 'తిప్పరా మీసం' చిత్రంతో ప్రేక్షకుల ముందుకు వచ్చాడు. 

కెరీర్ ఆరంభంలో క్యారెక్టర్ ఆర్టిస్ట్ గా పలు చిత్రాల్లో నటించిన శ్రీవిష్ణు ప్రస్తుతం సోలో హీరోగా ఎదిగేందుకు ప్రయత్నిస్తున్నాడు. ఈ ఏడాది జూన్ లో విడుదలైన బ్రోచేవారెవరురా చిత్రం మంచి విజయం సాధించింది. మరోసారి శ్రీవిష్ణు తిప్పరా మీసం చిత్రంతో ప్రేక్షకులని అలరించాడు. 

శ్రీవిష్ణు రీసెంట్ గా ఓ ఇంటర్వ్యూలో అల్లు అర్జున్ గురించి ఆసక్తికర వ్యాఖ్యలు చేశాడు. శ్రీవిష్ణు బన్నీతో కలసి సన్నాఫ్ సత్యమూర్తి చిత్రంలో నటించిన సంగతి తెలిసిందే. ఆ సమయంలో అల్లు అర్జున్ నాకు విలువైన సలహాలు ఇచ్చాడు. 

సన్నాఫ్ సత్యమూర్తి కంటే ముందుగానే బన్నీ నేను నటించిన ప్రేమ ఇష్క్ కాదల్ చిత్రాన్ని చూశాడు. నా నటనకు ప్రశంసలు తెలిపాడు. అదేవిధంగా నేను కమర్షియల్ చిత్రాలతో పాటు, విభిన్నమైన చిత్రాల్లో కూడానా నటించాలని బన్నీ ప్రోత్సహించాడు. నాకంటూ ప్రత్యేకమైన క్రేజ్ క్రియేట్ చేసుకోమని చెప్పాడు. అందుకోసం నాకు విజయ్ సేతుపతి, శివకార్తికేయన్ లని ఉదాహరణగా చెప్పాడు. 

అప్పటికి విజయ్ సేతుపతి, శివకార్తికేయన్ కెరీర్ ఆరంభంలోనే ఉంది. బన్నీ చెప్పేవరకు వారిద్దరూ ఎవరో నాకు తెలియదు. బన్నీ చెప్పాక వారిద్దరిని ఫాలో కావడం ఆరంభించా. అది తనలో చాలా మార్పు తీసుకువచ్చిందని శ్రీవిష్ణు తెలిపాడు.