రానాతో నయనతార రొమాన్స్.. నో చెప్పిన కీర్తి సురేష్?
సౌత్ లేడీ సూపర్ స్టార్ నయనతార ఇటీవల మెగాస్టార్ చిరంజీవి సరసన సైరా చిత్రంలో నటించింది. నయనతార ఇటీవల చాలా సెలెక్టివ్ గా చిత్రాలు ఎంచుకుంటోంది. తమిళంలో రజనీ సరసన దర్బార్, విజయ్ సరసన బిగిల్ చిత్రాల్లో నటిస్తోంది.
బాహుబలి చిత్రంలో భల్లాలదేవుడిగా అద్భుత నటనతో మెప్పించిన రానా భవిష్యత్తులో మరిన్ని ప్రయోగాత్మక చిత్రాలకు రెడీ అవుతున్నాడు. ప్రస్తుతం రానా విరాటపర్వం చిత్రంలో నటిస్తున్నాడు. రానా నటించే తదుపరి చిత్రానికి సంబంధించిన ఆసక్తికర వార్త తాజాగా బయటకు వచ్చింది.
ఓ కొరియన్ యాక్షన్ చిత్ర తెలుగు రీమేక్ లో రానా నటించబోతున్నట్లు తెలుస్తోంది. ఆ చిత్రం చూసిన రానా ఇంప్రెస్ అయ్యాడట. దీనితో తెలుగులో రీమేక్ చేయాలని నిర్ణయించుకున్నాడు. ఈ చిత్రంలో ఫిమేల్ లీడ్ గా కీర్తి సురేష్ ని అనుకున్నారట. ఈ పాత్రలో కీర్తి సురేష్ పోలీస్ అధికారి పాత్రలో నటించాల్సి ఉంటుంది.
కానీ కీర్తి సురేష్ ఈ చిత్రానికి నో చెప్పినట్లు టాక్. దీనితో రానా టీం నయనతారని సంప్రదించారు. కొరియన్ చిత్రాన్ని చూసిన నయన్ వెంటనే ఒకే చెప్పినట్లు తెలుస్తోంది. వీలైనంత త్వరగా ఈ చిత్రాన్ని ప్రారంభించాలని రానా భావిస్తున్నాడు. త్వరలో ప్రీప్రొడక్షన్ కార్యక్రమాలు ప్రారంభించి అధికారికంగా ఈ చిత్రాన్ని ప్రకటించనున్నట్లు తెలుస్తోంది.
నయనతార, రానా జంటగా ఇదివరకే కృష్ణంవందే జగద్గురుమ్ చిత్రంలో నటించారు. క్రిష్ దర్శకత్వంలో తెరకెక్కిన ఆ మూవీ పర్వాలేదనిపించింది. రానా కోసం వరుసగా భారీ చిత్రాలు ఎదురుచూస్తున్నాయి. రానా ప్రస్తుతం ఓ హిందీ మూవీలో కూడా నటిస్తున్నాడు. ఇక గుణశేఖర్ దర్శకత్వంలో భారీ పౌరాణిక చిత్రం హిరణ్యకశ్యప రూపొందనుంది.