ఆరు వికెట్ల తేడాతో తొలి వన్డేలో విజయాన్ని అందుకున్న టీమిండియా... రోహిత్ శర్మ హాఫ్ సెంచరీ...

సౌతాఫ్రికా టూర్‌లో వరుసగా ఐదు మ్యాచుల్లో ఓడిన తర్వాత స్వదేశంలో విజయాన్ని రుచి చూసింది భారత జట్టు.. వెస్టిండీస్‌తో జరిగిన తొలి వన్డేలో 6 వికెట్ల తేడాతో ఘన విజయాన్ని అందుకుంది టీమిండియా. 1000వ వన్డే మ్యాచ్‌లో బౌలింగ్, బ్యాటింగ్, ఫీల్డింగ్ విభాగాల్లో ఆల్‌రౌండ్ షో చూపించింది భారత జట్టు... 

శిఖర్ ధావన్, రుతురాజ్ గైక్వాడ్ కరోనా బారిన పడడంతో ఓపెనర్‌గా ఎంట్రీ ఇచ్చిన రోహిత్, ఇషాన్ కిషన్ కలిసి శుభారంభం అందించారు. తొలి వికెట్‌కి 84 పరుగులు జోడించిన తర్వాత కెప్టెన్ రోహిత్ శర్మ అవుట్ అయ్యాడు. 

51 బంతుల్లో 10 ఫోర్లు, ఓ సిక్సర్‌తో 60 పరుగులు చేసిన రోహిత్ శర్మ, అల్జెరీ జోసఫ్ బౌలింగ్‌లో ఎల్బీడబ్ల్యూగా అవుట్ అయ్యాడు. అదే ఓవర్‌లో వస్తూనే రెండు ఫోర్లు బాదిన విరాట్ కోహ్లీ, 4 బంతుల్లో 8 పరుగులు చేసి అవుట్ అయ్యాడు...

36 బంతుల్లో 2 ఫోర్లు, ఓ సిక్సర్‌తో 28 పరుగులు చేసిన ఓపెనర్ ఇషాన్ కిషన్, అకీల్ హుస్సేన్ బౌలింగ్‌లో ఫ్యాబియన్ ఆలెన్‌కి క్యాచ్ ఇచ్చి పెవిలియన్ చేరాడు. ఆదుకుంటాడనుకున్న రిషబ్ పంత్, 9 బంతుల్లో 2 ఫోర్లతో 11 పరుగులు చేసి రనౌట్ అయ్యాడు.

ఒకానొక దశలో 84/0 స్కోరుతో ఉన్న భారత జట్టు, వెంటవెంటనే నాలుగు వికెట్లు కోల్పోయి 116/4 స్థితికి చేరుకుంది. ఈ దశలో దీపక్ హుడా, సూర్యకుమార్ యాదవ్ కలిసి ఐదో వికెట్‌కి అజేయంగా పరుగుల భాగస్వామ్యం జోడించి టీమిండియాకి విజయాన్ని అందించారు.

దీపక్ హుడా 32 బంతుల్లో 2 ఫోర్లతో 26 పరుగులు చేయగా, సూర్యకుమార్ యాదవ్ 36 బంతుల్లో 5 ఫోర్లతో 34 పరుగులు చేసి మ్యాచ్‌ని ముగించాడు. అంతకుముందు టాస్ ఓడి తొలుత బ్యాటింగ్ చేసిన వెస్టిండీస్, 43.5 ఓవర్లలో 176 పరుగులకి ఆలౌట్ అయ్యింది... ఆరంగ్రేటం మ్యాచ్‌లో అత్యధిక పరుగులు ఇచ్చిన భారత బౌలర్‌గా చెత్త రికార్డు క్రియేట్ చేసిన సిరాజ్, రెండేళ్ల తర్వాత వన్డేల్లో రీఎంట్రీ ఇచ్చాడు. 10 బంతుల్లో 2 ఫోర్లతో 8 పరుగులు చేసిన షై హోప్, మహ్మద్ సిరాజ్ బౌలింగ్‌లో క్లీన్ బౌల్డ్ అయ్యాడు. 26 బంతుల్లో 2 ఫోర్లతో 13 పరుగులు చేసిన బ్రెండన్ కింగ్‌, వాషింగ్టన్ సుందర్ బౌలింగ్‌లో సూర్యకుమార్ యాదవ్‌కి క్యాచ్ ఇచ్చి అవుట్ అయ్యాడు. 

34 బంతుల్లో 3 ఫోర్లతో 18 పరుగులు చేసిన డారెన్ బ్రావో, వాషింగ్టన్ సుందర్ బౌలింగ్‌లో ఎల్బీడబ్ల్యూగా అవుట్ అయ్యాడు. 25 బంతుల్లో 3 ఫోర్లతో 18 పరుగులు చేసిన నికోలస్ పూరన్‌ను ఎల్బీడబ్ల్యూగా అవుట్ చేసిన యజ్వేంద్ర చాహాల్, వన్డే కెరీర్‌లో 100 వికెట్ల మైలురాయిని అందుకున్నాడు...

60 వన్డేల్లో ఈ ఫీట్ సాధించిన యజ్వేంద్ర చాహాల్, అత్యంత వేగంగా ఈ ఫీట్ సాధించిన ఐదో భారత బౌలర్‌గా నిలిచాడు. ఇంతకుముందు మహ్మద్ షమీ (56), జస్ప్రిత్ బుమ్రా (57), కుల్దీప్ యాదవ్ (58), ఇర్ఫాన్ పఠాన్ (59) మ్యాచుల్లో ఈ ఫీట్ సాధించి, యజ్వేంద్ర చాహాల్ కంటే ముందున్నారు...

పూరన్ అవుటైన తర్వాతి బంతికే విండీస్ కెప్టెన్ కిరన్ పోలార్డ్‌ను గోల్డెన్ డకౌట్ చేశాడు యజ్వేంద్ర చాహాల్. చాహాల్ బౌలింగ్‌లో పోలార్డ్ క్లీన్‌బౌల్డ్ అయ్యాడు... 26 బంతుల్లో 12 పరుగులు చేసిన షమర్ బ్రూక్స్ కూడా చాహాల్ బౌలింగ్‌లోనే రిషబ్ పంత్‌‌కి క్యాచ్ ఇచ్చి పెవిలియన్ చేరాడు...

3 బంతులాడి పరుగులేమీ చేయలేకపోయిన అకీల్ హుస్సేన్, ప్రసిద్ధ్ కృష్ణ బౌలింగ్‌లో పంత్‌కి క్యాచ్ ఇచ్చి అవుట్ అయ్యాడు. 79 పరుగులకే 7 వికెట్లు కోల్పోయి పీకల్లోతు కష్టాల్లో పడింది వెస్టిండీస్. ఈ దశలో ఫ్యాబియన్ ఆలెన్, జాసన్ హోల్డర్ కలిసి 8వ వికెట్‌కి 78 పరుగుల భాగస్వామ్యం నెలకొల్పారు. 43 బంతుల్లో 2 ఫోర్లతో 29 పరుగులు చేసిన ఫ్యాబియన్ ఆలెన్, సుందర్ బౌలింగ్‌లో అతనికే క్యాచ్ ఇచ్చి పెవిలియన్ చేరాడు...

ఆ తర్వాత 71 బంతుల్లో 4 సిక్సర్లతో 57 పరుగులు చేసిన జాసన్ హోల్డర్, ప్రసిద్ధ్ కృష్ణ బౌలింగ్‌లో అవుట్ అయ్యాడు. 16 బంతుల్లో ఓ ఫోర్, ఓ సిక్సర్‌ బాది 13 పరుగులు చేసిన అల్జెరీ జోసఫ్‌ను యజ్వేంద్ర చాహాల్ అవుట్ చేయడంతో విండీస్ ఇన్నింగ్స్‌కి తెరపడింది... భారత బౌలర్లలో చాహాల్ 4 వికెట్లు తీయగా వాషింగ్టన్ సుందర్ మూడు, ప్రసిద్ధ్ కృష్ణ రెండు వికెట్లు తీశారు. సిరాజ్‌కి ఓ వికెట్ దక్కింది.