తిరుమల వచ్చే భక్తుల కోసం సంచలన నిర్ణయం...ఇక ఆ బెంగ అవసరమే లేదు..TTD

తిరుమల అభివృద్ధిపై సమీక్ష నిర్వహించిన టీటీడీ.. జూన్‌లో గోవిందరాజస్వామి, కోదండరామ స్వామి, కడప లక్ష్మీవేంకటేశ్వరాలయాల్లో విశేష ఉత్సవాలు జరగనున్నట్లు అధికారులు తెలిపారు.

tirumala tirupati

Image Credit: Asianet News

తిరుమలలో అభివృద్ధి పనులపై తిరుమల తిరుపతి దేవస్థానం (టీటీడీ) ఈవో జె. శ్యామలరావు సమీక్ష నిర్వహించారు. అన్నమయ్య భవన్‌లో జరిగిన ఈ సమావేశంలో, తిరుమలలోని కేంద్రీయ విచారణ కార్యాలయం (సీఆర్వో), ఆకాశగంగ, పాపవినాశనం ప్రాంతాల ఆధునీకరణపై చర్చ జరిగింది. సీఆర్వో చుట్టుపక్కల ఉన్న ఖాళీ ప్రదేశాలను భక్తులకు ఉపయుక్తంగా మలచేలా ప్రణాళికలు రూపొందించాలని అధికారులను ఆదేశించారు.

భక్తులకు దర్శనం, వసతి, ఇతర సౌకర్యాలు మరింత మెరుగ్గా అందించేందుకు చర్యలు తీసుకోవాలని ఈవో సూచించారు. భవిష్యత్ అవసరాలను దృష్టిలో ఉంచుకుని ఆకాశగంగ, పాపవినాశనం ప్రాంతాల అభివృద్ధి పట్ల ప్రత్యేక దృష్టి పెట్టాల్సిన అవసరం ఉందన్నారు. ట్రాఫిక్ అంతరాయం లేకుండా ముందస్తు చర్యలు తీసుకోవాలని సూచించారు. ఈ సమీక్షలో అదనపు ఈవో వెంకయ్య చౌదరి, చీఫ్ ఇంజినీర్ సత్యనారాయణ, డిజైన్ నిపుణులు రాముడు ఇతర అధికారులు హాజరయ్యారు.

ఇక జూన్ నెలలో టీటీడీకి చెందిన వివిధ ఆలయాల్లో విశేష ఉత్సవాలు జరుగనున్నాయి. తిరుపతిలోని శ్రీ గోవిందరాజస్వామి ఆలయంలో జూన్ 2 నుండి 10 వరకు వార్షిక బ్రహ్మోత్సవాలు జరుగుతాయి. ఈ ఉత్సవాలకు జూన్ 1న సాయంత్రం అంకురార్పణ ఉంటుంది. జూన్ 20, 27 తేదీల్లో శ్రీ ఆండాళ్ అమ్మవారు,  శ్రీ పుండరీకవళ్లి అమ్మవారి ఊరేగింపులు జరుగనున్నాయి. జూన్ 24న రోహిణి నక్షత్రం సందర్భంగా శ్రీపార్థసారధి స్వామివారు ఊరేగి భక్తులకు దర్శనమిస్తారు.

మే 31 నుండి జూన్ 9 వరకు నమ్మాళ్వార్ ఉత్సవం జరగనుంది. ఒంటిమిట్టలోని శ్రీ కోదండరామాలయంలో జూన్ 11న పౌర్ణమి సందర్భంగా శ్రీ సీతారాముల కల్యాణోత్సవం ఉంటుంది.కడపలోని శ్రీ లక్ష్మీవేంకటేశ్వర స్వామి ఆలయంలో కూడా జూన్ నెలలో పలు ఉత్సవాలు జరుగుతాయి. జూన్ 3న పుబ్బ నక్షత్రం, జూన్ 4న ఉత్తర నక్షత్రం, జూన్ 15న శ్రవణ నక్షత్రం, జూన్ 27న పునర్వసు నక్షత్రాల సందర్భాలలో స్నపనాలు, ఊరేగింపులు, కళ్యాణోత్సవాలు నిర్వహించనున్నారు. ప్రతి శనివారం సాయంత్రం గ్రామోత్సవం జరుగుతుంది.

ఈ విధంగా తిరుమల అభివృద్ధి పనులతో పాటు జూన్ నెలలో అనేక ఆలయాల్లో టీటీడీ ఆధ్వర్యంలో ప్రత్యేక ఉత్సవాలు జరగనున్నాయి.