ప్రభుత్వ ఆర్థిక పరిస్థితి బాగానే ఉంటే ఇంతవరకు జీతాలు ఎందుకివ్వలేదు..: టీడీపీ
Vijayawada: ఉద్యోగులు జీతాల కోసం కలెక్టరేట్ల వద్ద ధర్నాలు చేయాదలుచుకున్నారంటే రాష్ట్ర ఆర్థిక పరిస్థితి ఎలా ఉందో సులువుగా అర్థం చేసుకోవచ్చని ప్రతిపక్ష తెలుగు దేశం పార్టీ (టీడీపీ) ఎమ్మెల్సీ అశోక్ బాబు అన్నారు. మరోవైపు జీతాల విషయంలో పరిస్థితి చక్కబడకపోతే సంక్రాంతి తర్వాత ఆందోళన చేపట్టాలని ఏపీజేఏసీ (అమరావతి) నేతలు నిర్ణయించారు.
Andhra Pradesh financial situation: రాష్ట్ర ఆర్థిక పరిస్థితి చాలా మెరుగ్గానే ఉందని అధికార పార్టీ నేతలు చెబుతున్నా ఈ నెల 13 వరకు ప్రభుత్వ ఉద్యోగులకు ఎందుకు జీతాలు ఇవ్వలేదని ఎమ్మెల్సీ, టీడీపీ సీనియర్ నేత పరుచూరి అశోక్బాబు రాష్ట్ర ప్రభుత్వాన్ని ప్రశ్నించారు. ఏపీఎన్జీవోల సంఘం మాజీ అధ్యక్షుడు అశోక్బాబు విజయవాడ టీడీపీ కేంద్ర కార్యాలయంలో మీడియాతో మాట్లాడుతూ.. జీతాలు డిమాండ్ చేస్తూ జిల్లా కలెక్టరేట్ల ముందు ఉద్యోగులు ధర్నాలు చేసే పరిస్థితి ఎందుకు వచ్చిందని ప్రభుత్వాన్ని ప్రశ్నించారు. ఉద్యోగులకు ఇంకా జీతాలు ఇవ్వకపోవడంతో రాష్ట్ర ఆర్థిక పరిస్థితి ఎలా ఉంటుందో ఎవరైనా సులభంగా ఊహించుకోవచ్చు అని వ్యాఖ్యానించారు.
ఉద్యోగులకు సకాలంలో జీతాలు అందని 1959 నాటి పరిస్థితిని ఇప్పుడు రాష్ట్రం దాటిపోతోందని ఆరోపించిన అశోక్ బాబు.. 13 లక్షల మంది ఉద్యోగులకు ప్రతినెలా ఒకటో తేదీనే జీతాలు ఇస్తున్నారని అధికార పార్టీ చెప్పకనే చెబుతుందన్నారు. రాష్ట్రానికి రుణాలు అందకపోవడంతో ముఖ్యమంత్రి వైఎస్ జగన్మోహన్రెడ్డి జీతాలు చెల్లించలేకపోతున్నారనీ, సొంత ఉద్యోగులపై అధికార పార్టీ ప్రతీకార ధోరణి అవలంభిస్తోందని ఆరోపించారు. ఉద్యోగులు ప్రభుత్వ పెద్దల కాళ్లపై పడాల్సిందేనంటూ ఇటీవల ఓ కేబినెట్ మంత్రి చేసిన వ్యాఖ్యలను ఎత్తిచూపిన అశోక్బాబు.. ప్రభుత్వ సిబ్బందికి అలాంటి పరిస్థితి ఎప్పటికీ రాదని స్పష్టం చేశారు. ఉద్యోగులు ప్రభుత్వ పెద్దల కాళ్లపై ఎందుకు పడాలని ప్రశ్నించారు.
అడ్వైజర్లు, వాలంటీర్ల ప్రయోజనాల కోసం ఉద్యోగులు ఎందుకు బాధపడాలని ఆయన ప్రశ్నించారు. రిటైర్మెంట్ బెనిఫిట్స్ రూ.2,200 కోట్లు కూడా ఇంకా చెల్లించలేదన్నారు. ఇప్పటి వరకు బీమా ప్రీమియం కూడా చెల్లించని పరిస్థితి చాలా దారుణంగా ఉందన్నారు. కాంట్రాక్టు, ఔట్సోర్సింగ్, రెగ్యులర్ ఉద్యోగులకు డీఏ బకాయిలు సహా ఉద్యోగులకు రావాల్సిన రూ.27.150 కోట్లను జగన్ ప్రభుత్వం పెండింగ్లో ఉంచిందనీ, కాంట్రిబ్యూటరీ పెన్షన్ స్కీమ్ కింద ప్రభుత్వ కోటా రూ.800 కోట్లు కూడ చెల్లించలేదని ఎమ్మెల్సీ అశోక్ బాబు పేర్కొన్నారు.
ప్రతినెలా 1వ తేదీన జీతాలు ఇవ్వాలి..
రాష్ట్ర ప్రభుత్వ ఉద్యోగులకు జీతాల చెల్లింపులో జాప్యం జరుగుతోందని ఆందోళన వ్యక్తం చేసిన ఏపీ జేఏసీ (అమరావతి) ఉద్యోగులకు ఇచ్చిన హామీని నిలబెట్టుకోవాలనీ, ప్రతినెలా 1వ తేదీనే జీతాలు చెల్లించాలని ప్రభుత్వాన్ని డిమాండ్ చేసింది. ఏపీ జేఏసీ (అమరావతి) రాష్ట్ర కార్యవర్గ సమావేశం మంగళవారం రెవెన్యూ సర్వీసెస్ అసోసియేషన్ కార్యాలయంలో జరిగింది. జీతాలు, పింఛన్లు ఆలస్యంగా అందజేయడం, బకాయిలు, అలవెన్సులు పెండింగ్లో ఉండడం, పాత పెన్షన్ విధానం అమలుకాకపోవడం వంటి పలు అంశాలపై జేఏసీ నేతలు చర్చించారు. సమావేశంలో ఏపీ జేఏసీ చైర్మన్ బొప్పరాజు వెంకటేశ్వర్లు, ప్రధాన కార్యదర్శి వైవీ రావు, 26 జిల్లాల నాయకులు పాల్గొన్నారు. జాప్యం లేకుండా ప్రతినెలా ఒకటో తేదీన జీతాలు చెల్లించాలని జేఏసీ నాయకులు ప్రభుత్వాన్ని డిమాండ్ చేశారు. ప్రభుత్వం సకాలంలో జీతాలు చెల్లించడంలో, అలవెన్సుల విడుదల వంటి ఇతర హామీలను నెరవేర్చడంలో విఫలమైతే సంక్రాంతి పండుగ తర్వాత ఉద్యోగులు ఆందోళనకు దిగుతారని పేర్కొన్నారు.