జనసేన పొలిటిక్స్: ముద్రగడతో మాజీ జెడీ లక్ష్మినారాయణ భేటీ
కాపు ఉద్యమనేత ముద్రగడ పద్మనాభంతో జనసేన నేత, సిబిఐ మాజీ జెడీ లక్ష్మీనారాయణ భేటీ కావడం చర్చనీయాంశంగా మారింది. కిర్లంపూడిలోని ముద్రగడ నివాసంలో ఈ భేటీ జరిగింది. వారిద్దరు గంట సేపు మంతనాలు జరిపారు.
కాకినాడ: సిబిఐ మాజీ జాయింట్ డైరెక్టర్ లక్ష్మినారాయణ కాపు ఉద్యమ నేత ముద్రగడ పద్మనాభంతో భేటీ అయ్యారు. తూర్పు గోదావరి జిల్లా కిర్లంపూడిలోని ముద్రగడ పద్మనాభం నివాసంలో ఈ భేటీ జరిగింది.
లక్ష్మినారాయణ కోసం ముద్రగడ అల్పాహార విందు ఏర్పాటు చేశారు. ఆ తర్వాత గంట సేపు ఇద్దరి మధ్య చర్చలు జరిగాయి. రాష్ట్ర రాజకీయ పరిస్థితులపై వారు చర్చించుకున్నట్లు తెలుస్తోంది. అయితే, జనసేనలో లక్ష్మినారాయణ అంత చురుగ్గా పాల్గొనడం లేదు.
జనసేన నుంచి లక్ష్మినారాయణ తప్పుకుంటారనే వార్తలు కూడా వచ్చాయి. అయితే, ఆ వార్తలను ఆయన ఖండించారు. తాజాగా ముద్రగడ పద్మనాభం తెలుగుదేశం పార్టీ అధినేత నారా చంద్రబాబు నాయుడిని విమర్శిస్తూ ఓ బహిరంగ లేఖ రాశారు.
శాసనసభ మాజీ స్పీకర్ కోడెల శివప్రసాద రావు అంతిమ యాత్రలో చంద్రబాబు ఇచ్చిన సంకేతాలను విమర్శిస్తూ ఆయన తీవ్రమైన వ్యాఖ్యలు చేశారు. ఈ నేపథ్యంలో వారిద్దరి మధ్య భేటీ రాజకీయంగా ప్రాధాన్యాన్ని సంతరించుకుందని భావిస్తున్నారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
