Asianet News TeluguAsianet News Telugu

కరోనా నిర్దారణకు ఐదు రకాల టెస్టులు... అత్యుత్తమం ఏదంటే: కోవిడ్ నోడల్ ఆఫీసర్

కోవిడ్-19 దేశంలోకి వైరస్ వచ్చి దాదాపు నాలుగు నెలలు దాటిందని...దేశ వ్యాప్తంగా మొదట్లో పదులు, వందల్లో  రోజువారీగా వున్న కేసులు ఇప్పుడు 60వేలకు పైగా నమోదవుతున్నాయని కోవిడ్ స్టేట్ నోడల్ ఆఫీసర్ డాక్టర్ అర్జా శ్రీకాంత్ పేర్కొన్నారు. 

Doctor Srikanth explains different types of COVID-19 tests
Author
Amaravathi, First Published Aug 10, 2020, 12:06 PM IST

అమరావతి: కోవిడ్-19 దేశంలోకి వైరస్ వచ్చి దాదాపు నాలుగు నెలలు దాటిందని...దేశ వ్యాప్తంగా మొదట్లో పదులు, వందల్లో  రోజువారీగా వున్న కేసులు ఇప్పుడు 60వేలకు పైగా నమోదవుతున్నాయని కోవిడ్ స్టేట్ నోడల్ ఆఫీసర్ డాక్టర్ అర్జా శ్రీకాంత్ పేర్కొన్నారు. అయినా ఇప్పటికీ చాలా మంది బహిరంగ ప్రదేశాల్లో మాస్క్ ధరించడం, భౌతిక దూరం పాటించడం లాంటి నియమాలను పెద్దగా పాటించడం లేదన్నారు. కోవిడ్ వ్యాప్తికి ఇదీ ఒక ప్రదాన కారణమని నిపుణులు విశ్లేషిస్తున్నారన్నారు. 

ఈ నేపథ్యంలో కోవిడ్-19 లక్షణాలు కనిపిస్తే ఎలాంటి పరీక్షలు చేస్తారన్నదానిపైనా ప్రజలకు అవగాహన వుండాలని అన్నారు. అందువల్లే టెస్టుల రకాలు, వాటి ఖచ్చితత్వానికి సంబంధించిన వివరాలను తెలియజేస్తున్నానని అన్నారు. 

కరోనా టెస్టుల రకాలు...

1. RT-PCR టెస్ట్: దీన్ని రియల్‌ టైమ్‌ పాలిమరైజ్‌ చైన్‌ రియాక్షన్‌ అంటారు. ఈ పరీక్షని మీ ముక్కు లేదా గొంతులోని స్వాబ్ తీసి పరీక్షిస్తారు. ఫలితం రావడానికి 2-3 రోజులు పడుతుంది. ఈ పరీక్షలో పాజిటివ్ వస్తే 100% పాజిటివ్ అనే అర్ధం. నెగిటివ్ వస్తే 99% నెగిటివ్ అని అర్ధం.  వైరస్‌ నిర్ధారణలో ప్రపంచంలోనే ఇది అత్యుత్తమ పద్ధతిగా గుర్తిస్తున్నారు.   
 

2. ర్యాపిడ్ ఆంటిజెన్ టెస్ట్: ఈ పరీక్ష కూడా స్వాబ్ ద్వారానే పరీక్షస్తారు. కానీ ఫలితం 15 నిమిషాల్లో తెలుస్తుంది. ఈ పరీక్షలో పాజిటివ్ వస్తే 100% పాజిటివ్ అనే అర్ధం . నెగిటివ్ వచ్చి, కోవిడ్ లక్షణాలు తగ్గకపోతే తప్పకుండా RT-PCR టెస్ట్ చేయించుకోవాలి 

3. ట్రూనాట్ పరీక్ష: RT-PCR మాదిరిగానే పనిచేస్తుంది. అలాగే వేగంగా ఫలితాలను ఇస్తుంది. కోవిడ్ -19 కోసం స్క్రీనింగ్ మరియు నిర్ధారణ కోసం ఈ పరీక్ష చేస్తారు. ఇది కూడా నోరు, ముక్కు లోని స్వాబ్ ద్వారా వైరస్ కనుగొనాల్సి ఉంది.

4. HRCT-LUNGS (సిటి స్కాన్ ): ఆంటిజెన్ పరీక్షలో నెగిటివ్ వచ్చినప్పటికీ Hrct-chest లో పాజిటివ్ వచ్చిన కేసులు చాలా వున్నాయి. HRCT లో ఊపిరితిత్తులో ఇన్ఫెక్షన్ ఎంత వుంది స్కోరింగ్ కూడా రిపోర్ట్ లో వస్తుంది ఇది కూడా ముఖ్యమైన పరీక్ష. 

5. ఆంటిబాడీ టెస్ట్: ఈ పరీక్షని రక్త నమూనాలను సేకరించి చేయడం జరుగుతుంది. ఫలితం ఒక రోజు లోపే వస్తుంది. దీని ద్వారా వచ్చే ఫలితం సరి అయినది కాదు. కావున  క్రియాశీల కవిడ్ ని నిర్ధారించడానికి యాంటీబాడీ పరీక్షను ఎంచుకోవలదు.

''మనకు కోవిడ్ వచ్చిందా? లేదా? అని తెలుసుకునేందుకు ఆంటిజెన్ లేదా RT-PCR పరీక్షలు చేయించుకోవడం ఉత్తమం. ఆంటిబాడి టెస్టులు వైరస్ ఎంత మందికి వచ్చింది? హెర్డ్ ఇమ్యూనిటీ ఎలా ఉంది? ప్లాస్మాథెరపీకి ప్లాస్మా ఇవ్వొచ్చా? అని తెలుసుకోవడానికి ఈ టెస్ట్ చేయాలి. సిటీస్కాన్ అనేది కోవిడ్ ను నిర్ధారించలేదు. ఎవరైనా సిటీస్కాన్ ఆధారంగా కోవిడ్ వైద్యం చేసినా, ప్రభుత్వానికి తెలియపరచకుంండా వైద్యం చేసినా శిక్షార్హులని ఇదివరకే ప్రభుత్వం స్పష్టం చేసింది. కోవిడ్ పై ఎలాంటి సందేహాలు, సమస్యలు ఉన్నా ప్రభుత్వ హెల్ప్ లైన్ నంబర్ 104, 1902 కాల్ చేయవచ్చు'' అని డాక్టర్ శ్రీకాంత్ వెల్లడించారు. 
 


 

Follow Us:
Download App:
  • android
  • ios