మచిలీపట్నంలో విషాదం... స్కూల్ బస్సు కిందపడి యువకుడు దుర్మరణం

మచిలీపట్నం : స్కూల్ బస్సు చక్రాల కింద నలిగి యువకుడు ప్రాణాలు కోల్పోయిన విషాద ఘటన కృష్ణా జిల్లాలో చోటుచేసుకుంది. బస్ డ్రైవర్ నిర్లక్ష్యమే ఇరవయ్యేళ్లు కూడా నిండని యువకుడి  బలితీసుకుంది. చేతికందివచ్చిన కొడుకు ఇలా దుర్మరణం చెందడంతో తల్లిదండ్రులు కన్నీరుమున్నీరుగా విలపిస్తున్నారు.  

గూడూరు మండలం ముక్కోలు, గురిజేపల్లి గ్రామాల మధ్యలో చైతన్య టెక్నో స్కూల్ బస్సును నిలిపాడు డ్రైవర్ మల్లికార్జున రావు. చక్రాల్లో ఇరుక్కును గడ్డిని తీయాలని క్లీనర్ మణికంఠకు సూచించగా అతడు బస్సు కింద పడుకుని ఆ పని చేసాడు. అయితే అతడలా చక్రాల కింద వుండగానే డ్రైవర్ నిర్లక్ష్యంగా బస్సును ముందుకు పోనిచ్చాడు. దీంతో మణికంఠ తల పైనుండి బస్సు చక్రాలు దూసకెళ్లాయి. తీవ్రంగా గాయపడ్డ అతడిని హాస్పిటల్ కు తరలించినా పలితం లేకుండా పోయింది.  మచిలీపట్నం హాస్పిటల్లో చికిత్స పొందుతూ మణికంఠ మృతిచెందాడు. అతడి మృతికి కారణమైన బస్సు డ్రైవన్ ను పోలీసులు అదుపులోకి తీసుకున్నారు.