సీట్ల చిచ్చు: టీడీపీకి మల్లయ్య యాదవ్ గుడ్‌బై... ఇవాళ టీఆర్ఎస్‌లో చేరిక

టీటీడీపీలో అసంతృప్తుల సెగలు భగ్గుమంటున్నాయి. సీట్ల కేటాయింపులో తమకు అన్యాయం జరిగిందంటూ పలు నియోజకవర్గాలకు చెందిన కీలక నేతలు అధిష్టానంపై ఆగ్రహంతో ఉన్నారు. కోదాడకు చెందిన బొల్లం మల్లయ్య యాదవ్‌ పార్టీ పెద్దలపై తీవ్ర అసంతృప్తి వ్యక్తం చేస్తున్నారు.

మహాకూటమి పొత్తుల్లో భాగంగా కోదాడ టికెట్‌ను టీపీసీసీ చీఫ్ ఉత్తమ్ కుమార్ రెడ్డి సతీమణి... పద్మావతికి కేటాయించారు. దీంతో అధిష్టానంతో తాడోపేడో తేల్చుకోవాలనుకున్న మల్లయ్య చివరి వరకు ప్రయత్నించారు.

ఒక క్రమంలో రెబల్‌గా పోటీ చేయాలని భావించారు. అయితే చివరి నిమిషంలో టీడీపీకి గుడ్‌బై చెప్పి టీఆర్ఎస్‌లో చేరుతున్నట్లుగా ప్రకటించారు. అనుకోని కారణాల వల్ల తాను టీఆర్ఎస్‌లో చేరుతున్నట్లు తెలిపారు.

ఈ నిర్ణయం కొందరికి బాధను, ఇంకొందరికి సంతోషాన్ని కలిగిస్తుందని.. కానీ రాజకీయంగా తన ఉనికిని కాపాడుకునేందుకు ఈ నిర్ణయం తీసుకోక తప్పలేదని తనను ఆశీర్వదించాలని మల్లయ్య కోరారు. ఈ రోజు హైదరాబాద్‌ తెలంగాణ భవన్‌లో మల్లయ్య గులాబీ కండువా కప్పుకోనున్నారు.