సీబీఐ తాత్కాలిక డైరెక్టర్‌కు సుప్రీం షాక్: విధాన నిర్ణయాలొద్దు

సీబీఐ డైరెక్టర్‌ అలోక్ వర్మపై వచ్చిన ఆరోపణలపై విచారణను రెండు వారాల్లో పూర్తి చేయాలని సుప్రీంకోర్టు సీవీసీని ఆదేశించింది

న్యూఢిల్లీ: సీబీఐ డైరెక్టర్‌ అలోక్ వర్మపై వచ్చిన ఆరోపణలపై విచారణను రెండు వారాల్లో పూర్తి చేయాలని సుప్రీంకోర్టు సీవీసీని ఆదేశించింది. సీవీసీ విచారణ సుప్రీంకోర్టు జడ్జి పర్యవేక్షణలోనే సాగాలని కోర్టు  అభిప్రాయపడింది.

శుక్రవారం నాడు సీబీఐ మాజీ డైరెక్టర్ అలోక్ వర్మ దాఖలు చేసిన పిటిషన్‌పై  సుప్రీంకోర్టు విచారణ చేసింది. సీబీఐ తాత్కాలిక డైరెక్టర్‌గా నియమితులైన ఎం. నాగేశ్వరరావు  కేవలం అడ్మినిస్ట్రేటివ్ వ్యహరాలను మాత్రమే చూడాలని కోర్టు ఆదేశించింది. పాలనపరమైన కీలక నిర్ణయాలు తీసుకోవద్దని కోర్టు ఆదేశించింది.

సీబీఐ స్పెషల్ డైరెక్టర్ రాకేష్ ఆస్థానాను బదిలీ చేయడంపై తమకు  ఎలాంటి అభ్యంతరం లేదని సుప్రీంకోర్టు అభిప్రాయపడింది.సీబీఐ డైరెక్టర్ పై విచారణకు మూడు వారాల గడువును సీవీసీ కోరింది. కానీ రెండు వారాలు మాత్రమే సుప్రీం ఇచ్చింది.

అలోక్ వర్మ దాఖలు చేసిన పిటిషన్‌పై సీవీసీ, కేంద్రానికి సుప్రీంకోర్టు నోటీసులు  జారీ చేసింది.  ఈ పిటిషన్‌పై తదుపరి విచారణను నవంబర్ 12వ తేదీకి వాయిదా వేసింది సుప్రీంకోర్టు.

సంబంధిత వార్తలు