Parenting Tips: పిల్లల్ని ఎలా నిద్ర లేపాలో తెలుసా?

ఉదయాన్నే పిల్లలను నిద్ర లేపడం చాలా ముఖ్యం. కానీ, మనం ఎలా నిద్ర లేపుతున్నాం అనేది ఇంకా చాలా ముఖ్యం. మరి, నిపుణుల ప్రకారం అసలు పిల్లలను ఎలా నిద్రలేపాలో తెలుసుకుందాం

ఏ సమయానికి పడుకున్నా, పిల్లలు ఉదయాన్నే తొందరగా నిద్రలేవడానికి ఇష్టపడరు. ఎన్నిసార్లు లేపినా ఇంకాసేపు పడుకుంటాం అని చెబుతూ ఉంటారు. ఈ మాట వినగానే పేరెంట్స్ కి విపరీతమైన కోపం వచ్చేస్తుంది. దీంతో వెంటనే అరిచేస్తారు. తిట్టేసి.. బలవంతంగా నిద్ర లేపేస్తూ ఉంటారు. కానీ ఆ సమయంలో మీరు పిల్లలతో ప్రవర్తించే తీరు వారిపై రోజంతా ప్రభావం చూపిస్తుందని మీకు తెలుసా? అసలు పిల్లలను నిద్రపుచ్చే విధానం ఏంటో తెలుసా? ఎలా నిద్రలేపితే వారు రోజంతా సంతోషంగా ఉంటారో ఇప్పుడు తెలుసుకుందాం...

మీరు మీ పిల్లల్ని ఉదయాన్నే ఎలా నిద్ర లేపుతారనేది చాలా ముఖ్యం. మీరు మీ పిల్లల్ని ఏ మనస్తత్వంతో నిద్ర లేపుతారో, వారి రోజు కూడా అదే మనస్తత్వంతో ప్రారంభమవుతుంది. మీ పిల్లలకు రోజంతా సంతోషంగా ఉండాలి అంటే, వారిని ప్రేమగా నిద్రలేపడం చాలా ముఖ్యం.

అరుస్తూ నిద్ర లేపకండి

ఉదయాన్నే వారిని నిద్ర లేపడానికి వంటగది నుండి గట్టిగా అరవడానికి బదులుగా, వారి దగ్గరకు వెళ్లి వారి తలను నిమురుతూ, ప్రేమగా పిలుస్తూ వారిని నిద్ర లేపండి. ఉదయాన్నే తల్లిదండ్రుల స్పర్శ పిల్లలను రోజంతా భద్రత, ప్రేమ భావనతో నింపుతుంది.

పిల్లలు నిద్రలేచాక ఏం చేయాలి

మీ పిల్లలు నిద్రలేచాక, వారిని ప్రేమగా కౌగిలించుకోండి. కౌగిలించుకోవడం వల్ల మెదడులో ఆక్సిటోసిన్ హార్మోన్ విడుదలవుతుంది, దీనిని ప్రేమ హార్మోన్ అని కూడా అంటారు. ఈ హార్మోన్ మనలో ప్రేమ, నమ్మకం, మంచి భావాలను పెంచుతుంది.

ఉదయం దినచర్యను ఆహ్లాదకరంగా మార్చండి

పిల్లల్ని ఉదయాన్నే నిద్ర లేపి, తాజా గాలిలో బయటకు తీసుకెళ్లండి. ప్రారంభంలో కొన్ని ఇబ్బందులు ఎదురవుతాయి, కానీ నెమ్మదిగా ప్రయత్నిస్తే, మీరు పిల్లల్ని ఉదయాన్నే నిద్ర లేపి, వారికి ఇష్టమైన ఆట ఆడటానికి లేదా సైకిల్ తొక్కడానికి లేదా వ్యాయామం చేయడానికి ప్రోత్సహించవచ్చు.

పళ్ళు తోముకోవడాన్ని ఆటగా మార్చండి

మీ పిల్లలకు పళ్ళు తోముకోవడాన్ని ఒక ఆటగా మార్చండి. ఎవరు ముందుగా పళ్ళు తోముకుంటారో చూద్దాం అని చెప్పండి. ఈ విధంగా, మీరు స్నానం చేయడాన్ని కూడా ఆహ్లాదకరంగా మార్చవచ్చు. మీరు మీ పిల్లలకు బ్యాగ్ సర్దుకోవడం, బూట్లు పాలిష్ చేయడం వంటి చిన్న చిన్న పనులు ఇవ్వవచ్చు.