జాతీయస్థాయిలో ఉత్తమ నియోజకవర్గంగా తెలంగాణ రాష్ట్రంలోని పరకాల నిలిచింది. జాతీయ స్థాయిలోని  వివిధ రాష్ట్రాల్లోని నియోజకవర్గాల్లో అభివృద్ధి పనులను  ఢిల్లీలోని చాణక్య ఫౌండేషన్ పరిశీలించింది.

కాగా... ఆ ఫౌండేషన్ ఉత్తమ నియోజకవర్గంగా తెలంగాణలోని పరకాల నియోజకవర్గాన్ని ఎంపిక చేసింది. గతనెల 26న ఢిల్లీలో కేంద్రమంత్రి శ్రీ రామేశ్వర్ తేలి, పద్మ విభూషణ్ శ్రీ మురళీ మనోహర్ జోషి చేతుల మీదుగా ఎమ్మెల్యే శ్రీ చల్లా ధర్మారెడ్డి ఈ అవార్డును అందుకున్నారు. 

ఈ సందర్భాన్ని పురస్కరించుకొని మంగళవారం ప్రగతిభవన్ లో ఆయన సీఎం కేసీఆర్ ను కలిశారు. చల్లా ధర్మారెడ్డిని ముఖ్యమంత్రి శ్రీ కె. చంద్రశేఖర్ రావు అభినందించారు. ముఖ్యమంత్రి అమలు చేసిన అభివృద్ధి, సంక్షేమ పథకాల కారణంగానే తనకు ఈ అవార్డు వచ్చిందని ఎమ్మెల్యే ధర్మారెడ్డి పేర్కొన్నారు. తనకు అవార్డు రావడానికి కారణమైన ముఖ్యమంత్రికి ఆయన కృతజ్ఞతలు తెలిపారు.