అమెరికాలో ఓ హిందూ పూజారిపై స్థానికుడు దాడికి పాల్పడ్డాడు. న్యూయార్క్ ఫ్లోరల్ పార్క్ సమీపంలోని గ్లెన్‌ఓక్స్‌ శివశక్తి పీఠం ఉంది. అక్కడికి దగ్గరలోని రోడ్డుపై హరీశ్ చంద్ర పురీ అనే పూజారి జూలై 18న ఉదయం 11 గంటలకు నడుచుకుంటూ వెళ్తున్నాడు.

ఆ సమయంలో 52 ఏళ్ల సెర్గియో గోవియో అనే వ్యక్తి వెనుక నుంచి వచ్చి దాడి చేశాడు. ముఖంపై, శరీరంపై పిడిగుద్దులు కురిపించాడు. ఆ సమయంలో ‘‘ ఇది మా ప్రాంతం’’ అని సెర్గియో నినాదాలు చేశాడు.

అమెరికన్ దాడిలో తీవ్రంగా గాయపడిన హరీశ్ ఆసుపత్రిలో చేరాడు. ఈ ఘటనపై కేసు నమోదు చేసుకున్న పోలీసులు సెర్గియోను అదుపులోకి తీసుకున్నారు. కాగా.. అమెరికా అధ్యక్షుడు డొనాల్డ్ ట్రంప్ డెమోక్రటిక్ పార్టీకి చెందిన నలుగురు మహిళా సెనేటర్లపై జాతి విద్వేష వ్యాఖ్యలు చేసిన తర్వాత ఈ దాడి జరగడం గమనార్హం.

ఈ దాడిని ప్రతినిధుల సభ్యురాలైన గ్రేస్ మెంగ్ ఖండించారు. దేశంలో మైనారిటీ వర్గాలుగా ఉన్న హిందువులకు తాను అండగా ఉంటానని... పలు దేశాల నుంచి వలస వచ్చిన అనేకమంది మైనారిటీలు తన నియోజకవర్గంలో ప్రశాంతంగా ఉంటున్నారని మెంగ్ తెలిపారు.