వేణు నక్షత్రం తెలుగు కవిత: గాపాత రోజులెప్పుడొస్తయో!
తెలుగు కవి, రచయిత వేణు నక్షత్రం కరోనా వైరస్ వల్ల ఉత్పన్నమైన పరిస్థితుల మీద వేదనతో కవిత రాశారు. ఆ కవితను ఇక్కడ చదవండి.
 )
Followగాకరోనా డెల్టాలతోని - గన్నా గిన్నా
మస్త్ బాధల్ పడ్తిమి
ఆస్తులు పాయె- పాస్తులు పాయె
ఆఖరికి పానాలే పాయె
గంతల్నే వ్యాక్సిన్లు అనిరి - బూస్టర్ షాట్లు అనిరి
పోయినోండ్లు పోయిరి - ఇగ ఉన్నోల్లమన్న
జర్ర నిమ్మలంగుందాం అనుకుంటిమి
ఇగ అంత సద్దుమణిగి నట్టే అనిపించె
సినిమాలు, షికార్లు అన్నీ షురూ ఆయే
గంతల్నే పండుగొస్తుందనిరి
ఇగ పండుగనంగనే
పప్పు బెల్లాలు - పరమన్నాలు
అప్పాలు - చెగొడీలు
కోడి కూర - ముంత కల్లు
కొత్త బట్టలు -పతంగీలు
గంగిరెద్దులు - గంగి గోవులు
గివన్నీ గుర్తుకు రాంగానె
మన్సు మస్తు ఖుషీగయ్యే
ఇగ పండుగ షురూ చేద్దామనంగనే
మల్లా మొదలాయె కొత్తగా ఓమిక్రాన్!
దగ్గులు- తుమ్ములు
జ్వరాలు - నొప్పులు
మాస్కులు - శానిటైజర్లు
క్వారంటైన్ - క్వారంటైన్
‘పాడిందే పాడెరా పాసుపల్ల దాసరి’ అన్నట్లు
దీని పాడుగాను
మూడేండ్ల సందీ గదే ముచ్చట
ఇంకెన్ని రోజులిట్ల గడపాలో
ఇంకెన్ని తిప్పలు పడాలో
గాపాత రోజులెప్పుడొస్తయో!
కల్సి పండుగెపుడు సేసుకుంటమో!!
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
