Asianet News TeluguAsianet News Telugu

వారాల ఆనంద్ కవిత : ఇద్దరు

మనుషుల మధ్య అవిశ్వాసం మొలకెత్తి వూడలు దిగిన చెట్టయి విస్తరిస్తున్నది అంటూ కరీంనగర్ నుండి వారాల ఆనంద్ రాసిన  కవిత "  ఇద్దరు " ఇక్కడ చదవండి :
 

varala anand telugu poem iddaru
Author
Hyderabad, First Published Jul 1, 2022, 3:34 PM IST

విశాలమయిన ఆకాశంకింద
సారవంతమయిన భూమ్మీద
కలిసి బతకాల్సిన ఇద్దరి నడుమా
అలిఖిత విభజన రేఖ
ఆ విభజన రేఖమీది మౌనం
నన్ను అమితంగా భయపెడుతున్నది

మనుషులన్నంక ఇద్దరి మధ్య మాటలుండాలి కదా
మౌనం నాట్య మాడుతుందేమిటి
ఇద్దరి చూపులూ అప్పుడప్పుడయినా కలవాలి కదా
నాలుగు కళ్ళూ ఎందుకు అపనమ్మకంగా చూసుకుంటున్నాయి

ఇద్దరి చేతులూ స్నేహంగా కరచాలనం చేసుకుని
ఆత్మీయంగా ఆలింగనం చేసుకోవాలి కదా
ఇవ్వాళ
మనుషులు ఆత్మల్ని అంగట్లో అమ్మేసి
వట్టి దేహాలయి పోయారు
ఆ దేహాల నడుమ ఎడారులు మొలిసాయి
ఏ క్షణం ఎడారి ఎగిసి
ఇసుక తుఫానుగా చెలరేగుతుందోనని భయంగా వుంది

మనుషుల మధ్య
అంకురించిన అవిశ్వాసం మొలకెత్తి
వూడలు దిగిన చెట్టయి విస్తరిస్తున్నది  

ఇద్దరి నడుమా విభాజన రేఖ మీద
తిష్ట వేసుకున్న నిశ్శబ్దం
పేలేందుకు సిద్ధంగా వున్న బాంబులా
నన్ను భయ పెడుతున్నది    

Follow Us:
Download App:
  • android
  • ios