తోకల రాజేశం కవిత : మట్టి భాష
అమ్మలక్కల చీరకొంగుల నుంచి రాలిపడే మాటల్లోని తెలుగు తల్లి వైభవాన్ని మంచిర్యాల నుండి తోకల రాజేశం రాసిన కవిత ' మట్టి భాష ' లో చదవండి:
 )
Followనోటితో అక్షరాలను ఏరుకోవటం
తెలిసిన తరువాత
పదాలను కాగితపు పొలంలో నాటేయటం
నేర్చిన తరువాత
భాష తెలిసిందని సంబరపడ్డాను
నా కలం నుంచి
ప్రాణహితా జలాలు కురుస్తుంటే
నా గళం నుంచి
కోయిల స్వరాలు విరుస్తుంటే
నాదే అసలు భాషగా భ్రమ పడ్డాను
నాయిన రెండెద్దుల నడుమ నాగలై
చాళ్లుగా విచ్చుకుంటున్న భూమితో మాట్లాడుతున్నప్పుడు
నా తల్లి పొలం గడప మీద ఆకుపచ్చని ముగ్గులేస్తూ
మట్టిగొంతునెత్తి పాటందుకున్నప్పుడు
తెలుగు భాష
అన్నం మెతుకంత తియ్యగా మారటం చూసాను
నా చెయ్యి పట్టుకొని
రామాయణం చుట్టూ భారతం చుట్టూ తింపుతూ
నాయనమ్మ చెప్పే కథల్లోని పలుకులు
జీడి పలుకులంత కమ్మగా ఉంటై
మా ఊరి నుంచి మంచిర్యాలకు పోయే బస్సులో కూసుంటే
అమ్మలక్కల చీరకొంగుల నుంచి
రాలిపడే మాటల్లోని తెలుగు తల్లి
కాళ్లకు చేతులకు వెండి కడియాలు పెట్టుకున్న
నిండు ముత్తైదువులా కనిపిస్తుంది
చదువుకున్నోళ్లంతా భాష నోట్లో మట్టి కొడుతుంటే
భాషకింత మట్టినిపూసి బతికించుకుంటున్నది వాళ్లే
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
