కనికరాన్ని చూడు కర్కశం కసితీరా కాటేసినా అమృతమై కురవాలన్న మహోన్నతత్వం అంటూ డా. తిరునగరి శ్రీనివాస్ రాసిన కవిత ' ఒక యుద్ధం...' ఇక్కడ చదవండి :
మిణుగురును చూడు
చీకటిని తుద ముట్టించాలన్న
ఎడతెగని ధైర్యం
Add Asianetnews Telugu as a Preferred Source
మేఘాన్ని చూడు
విద్యుల్లతగా క్షణమైనా
మెరిసి అస్తిత్వం చాటాలన్న పంతం
కాలాన్ని చూడు
జీవితపు ప్రతి అంకంలో
చెరగని ముద్రగా మిగిలిపోవాలన్న సంకల్పం
హృదయాన్ని చూడు
తాను స్పందించినంత కాలం
ప్రతిస్పందనకు రాబట్టాలన్న తాపత్రయం
కనికరాన్ని చూడు
కర్కశం కసితీరా కాటేసినా
అమృతమై కురవాలన్న మహోన్నతత్వం
మట్టిని చూడు
చినుకు తడిపిన తనువు పరిమళాన్ని
పరివ్యాప్తం చేయాలన్న ధీరత్వం
చెట్టును చూడు
శాఖోపశాఖలుగా విస్తరిస్తూ లోకానికి
విశాలతను నేర్పించాలన్న మమకారం
