పేర్ల రాము కవిత : చెమట పూల పందిరి
చీకటిని కడుపులో దాచుకొని వెలుగును మాత్రమే తలా ఇంత పంచిబెట్టే ముడతలుపడ్డ వెన్నెల ఆమె అంటూ మహబూబాబాద్ నుండి పేర్ల రాము రాసిన కవిత " చెమట పూల పందిరి " ఇక్కడ చదవండి :
 )
Followపోద్దున్నే
సద్ది కట్టుకొని పోయి
గోసిబెట్టి మునుం పట్టె ఆమె
మట్టికి బువ్వపెట్టే మట్టితల్లి
చీకటిని కడుపులో దాచుకొని
వెలుగును మాత్రమే
తలా ఇంత పంచిబెట్టే
ముడతలుపడ్డ వెన్నెల ఆమె
నడుస్తుంటే డొంకలో
బుసలుకొట్టే పాములు కూడా
మట్టి కాళ్ళకి జేజేలు చెప్పిపోయే
గొప్పతనం ఆమెది
ఆమె పొలము
కోయబోయినప్పుడల్లా
చేతిలో రంపేకొడవలి
యుద్ధం నేర్చుకొంటుంది
చీకటి లోకంలో
తిరుగాడే పిల్లలని
తన హృదయకౌగిల్లో వెలిగించిన
మిణుగురు వెలుగుల ఆశ ఆమె
మొన్నీమధ్య
దారి తప్పి చేనుల్లోకి అడుగేశా
చెమటపూల చీరని కట్టుకున్న
పోశవ్వలాగే కన్పించింది ఆమె
నిజమే
వాగును దాటి
చెరువును దాటి
నదిని దాటినందుకే
సముద్రమైనిలబడింది ఆమె
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
