పుట్టుక చావుల మధ్యనున్న ప్రతి క్షణం నీదే అంటూ నస్రీన్ ఖాన్ రాసిన కవిత " జీవితం " ఇక్కడ చదవండి :
లేలేత చిగుళ్ళు
గాలితో కరచాలనం చేస్తే
పూవనంలో రెపరెలాడే మొగ్గలు
సూర్యుని పలకరింతకు
ఫక్కున నవ్వితే అది జీవితమే
Add Asianetnews Telugu as a Preferred Source
అడుగడుగునా తారసిల్లే ఏమార్పు కూడళ్ళతో
మెదడూ మనసూ పోటీ ఊయలలో బరిలోకి దిగితే
సంతులనం కొలిమిలో పరీక్షకు నిలబడుతుంది
గంతలు కట్టిన గుర్రానికి రహదారి ఒక్కటే తెలిసినట్లు
అర్జునుడి కంటికి చెట్టు కొమ్మల్లోని పక్షి మాత్రమే కనబడినట్లు
నీకు జీవించడం తెలిసుండాలి
జీవన మధురిమ తరగని నిధి
పుట్టుక చావుల మధ్యనున్న
ప్రతి క్షణం నీదే
బతుకు నాణేనికి కష్ట సుఖాలే పార్శ్వాలు
ఏదీ శాశ్వతం కాదన్న రహస్యం గ్రహించు
దృష్టి కోణం మార్చుకో
మోడువారిన చెట్టుకు చిగురింతేగా జీవితం
