సుధామురళి కవిత : చిట్టి
కుక్క తోక వంకర అంటాం కానీ మరి మనిషి బుద్ధి .... ఆసక్తికరంగా కొనసాగిన సుధామురళి కవిత " చిట్టి " ఇక్కడ చదవండి.
 )
Followచిట్టి
అవును
తాను
నేడో రేపో కాలం చేస్తుంది
ఎంతలా నేను మిగిలిన ప్రేమలో
కాస్త అన్నాన్ని కలిపి ముద్ద విసిరితే మాత్రం
కలకాలం నాతో ఎలా ఉండిపోతుంది
ఇకపై
ఇంటి చుట్టూ
రక్షణ గోడ ఉండదు కాబోలు
తానుండదుగా
కడుపు కరువుని ఎదిరించేందుకు
ఊరంతా తిరిగి వీధి గడప మీదకి
కాలుని చేర్చీ చేర్చగానే
చెమట వాసనకు బానిసైనట్టు నన్ను చుట్టేసేది
ఈసడింపులు అదిలింపులు
నేనిచ్చే ఈ బహుమతులను
ఏ చెవిలో వేసుకుని ఏ చెవిలోంచి వదిలేసేదో
ప్రేమ కారుతున్న నాలికతో నా పాదాలు తుడిచేది
సాంత్వన భాషను రాసేది
అర్ధరాత్రీ పట్టపగలూ
నిద్రా భంగానికి
నా ఆస్తి నాస్తి కాకుండా ఉండడానికి
తన నిద్రను విశ్వాసం కిందకు తొక్కి
తన చూపును డేగ కళ్లలోంచి ఎత్తుకొచ్చి
ఎన్ని జిత్తులతో కాపు కాసేది
తనిప్పుడు
కాలం చేస్తే
తన తోక వంకర పోతుందేమో
తనను తనలా ఆదరించని
నా బుద్ది వంకర........!?
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
